Enstagl da restar sin l'autostrada A13 dovran bleras automobilistas e blers automobilists – savens cun l'intenziun da spargnar temp – la via principala tranter Cuira e Domat. Là dentant na vai era betg pli spert vinavant, perquai ch'il traffic vegn dosà cun in'ampla. Mo ussa datti bunas novas per las fins d’emna cun bler traffic, almain per ils indigens da Domat.
Davent da l'auter onn da Pasca dastgan quels numnadamain duvrar la «lingia blaua», pia la via communala tranter la rundella sin l'autezza dal vitg da Favugn e l'ur da Domat. Uschia duai esser pussaivel da guntgir las colonnas che mainan en il vitg da Domat.
La «lingia blaua» duai pussibilitar a la la populaziun in access svelt e segir al vitg. E nus vulain era chaschunar anc pli grondas colonnas sin la via chantunala – uschia che la ruta alternativa da guntgida tras il vitg daventa pauc attractiva.
L'avantatg vesa il president communal Erich Kohler pia en ina cumbinaziun da guardar che la via chantunala è «stuppada» e porscher al la populaziun in access segir e svelt sur la via communala.
Quest sistem vegn duvrà mo en la direcziun sid, e la via duai vegnir duvrada tant per autos privats sco era per il traffic public. Ils velos na dastgan dentant betg pli passar. Tgi che ha la lubientscha da charrar e tgi betg, vesa la persuna che fa las controllas en furma d'ina carta ni d'ina vignetta. Questa «Plarenga-Card» survegnan ils indigens sco era las organisaziuns da glisch blaua ed il bus da Cuira.
La situaziun a Favugn
Anc betg uschè lunsch cun ils plans da sviar il traffic è la vischnanca da Favugn. Ma era sch'il traffic n’è betg uschè pesant sco tar lur vischins da Domat, avessan ins era là gugent ina soluziun per ils dis nua che tut stat airi, di il president communal Peter Camastral.
Nus avessan la pussaivladad dad ir sur la punt dal militar, ed ina proposta per far quai è era gia vegnida. Nus vegnin ad examinar quella, dentant vegn il militar a stuair porscher maun.
L'idea d'in abitant fiss da lubir als indigens ed a las indigenas da charrar sur la via da vischnanca davent da Cuira al Rossboden enfin a Favugn. La vischnanca è però avisada sin la collavuraziun dal militar.
Sin dumonda dad RTR scriva l'Armada svizra ch'ella saja averta da lantschar la discussiun per duvrar la ruta sur il Rain. Dentant stoppian blers facturs correspunder, tranter auter las mesiras da segirtad ch'i dovra durant ed ordaifer il manaschi da tir.
Tge ch’è gia ussa dentant segir: Davent da l'autra primavaira duai la «lingia blaua» esser in remedi per il traffic da sviament a Domat – almain per ils indigens e las indigenas.
