Il process da recurs en il cas da l’anteriur derschader da la Dretgira administrativa dal Grischun è vegnì spustà per la segunda giada, scriva la Dretgira superiura dal chantun Grischun. Quel fiss numnadamain stà planisà ils 14 da fanadur 2026, il motiv per il spustament n'è betg enconuschent.
Quai è gia la segunda giada ch'il termin da process è vegnì spustà. Il mars aveva la Dretgira federala decis quai pervia d’ina collisiun da termins.
Emprim termin spustà il mars
Il schaner 2026 aveva la defensiun, l’advocata da l’anteriur derschader sentenzià, fatg la dumonda a la Dretgira superiura dal Grischun da spustar il termin dal mars. La dretgira è restada tar il termin dals 17 da mars – sinaquai ha l’advocata tratg la dumonda al Tribunal federal, e quel ha decidì ch’il termin sto vegnir spustà.
Sco raschun aveva l’advocata numnà ch’ella haja gia in termin quel mardi a la Procura publica federala. Ins na possia betg esser en dus lieus – ed er na possia betg in auter advocat remplazzar ella en il cas.
Davart la Dretgira superiura dal Grischun n'avevi dà nagin commentari pertge ch’ins n’è betg entrà sin la dumonda per in auter termin da la defensiun il schaner, e pertge ch'ins n'ha betg preschentà plirs termins pussaivels a las partidas en il cas. Quai aveva Stefan Schmid, il responsabel d'infurmaziun da la Dretgira superiura dal Grischun, ditg envers RTR il mars.
Nagin proxim termin
Er questa giada èn schurnalistas e schurnalists accreditads vegnids infurmads be in'emna avant. Remartgabel è er che l'e-mail cun las infurmaziuns dal process sco per exempel las uras u ch'i na dastgan betg vegnir fatgas registraziuns, è vegnì gnanc trais uras avant l'e-mail cun l'infurmaziun ch'il process è annullà. In motiv daco ch'il termin vegn spustà n'è questa giada betg enconuschent. Dumondas en quest connex na vegnian betg respundidas. Impurtant è dentant ch'il delict na po betg surannar (verjähren) cunquai ch'i ha gia dà ina sentenzia.
La sentenzia da l'emprima instanza
En emprim'instanza aveva la dretgira regiunala declerà culpant l'um d'avair violà e mulestà ina praticanta. L'anteriur derschader è vegnì sentenzià ad in chasti cundiziunà che privescha da la libertad da 23 mais ed ad in chastì da daners da 60 dis a 90 francs. I sa tracta da chastis cundiziunads cun in temp d'emprova da dus onns. La Procura publica, sco accusadra, aveva pretendì 30 mais – da quels sis mais praschun cundiziunà. Tant l'accusà sco er la Procura publica han sinaquai fatg recurs cunter la sentenzia.
Critica vi da l'independenza da la giustia
Il cas ha procurà per discussiuns en l’entira Svizra, betg mo pervi da la natira dals delicts, mabain er pervi dal proceder da las autoritads grischunas. Critichers, sco il portal spezialisà «Inside Justiz» ed experts da dretg penal sco la professura da l'Universitad da Son Gagl, Monika Simmler, han crititgà fermamain che la Procura publica grischuna n'haja betg surdà l'inquisiziun ad in auter chantun. Il fatg che la procuratura responsabla ed il derschader accusà eran per «ti» ed enconuschevan bain in l'auter, ha chaschunà dumondas davart la neutralitad e l'independenza da la giustia grischuna. La Procura publica dal Grischun ha dentant adina accentuà ch'ella saja stada abla da far las inquisiziuns a moda cumplettamain independenta.
Er ch’i ha duvrà prest in onn fin che la sentenzia è insumma vegnida argumentada en scrit è vegnì crititgà. Tenor lescha è quai da far aifer 60 dis, en cas cumplexs aifer 90 dis. Experts da dretg na chapeschan betg, daco che quai è ì uschè ditg. Ed ina part da l’argumentaziun per questa sentenzia da 23 mais è stada ch’i haja dà ina condemnaziun prematura tras las medias, quai na possia betg esser in argument en quest cas. Tut quai pudess laschar enavos ina impressiun intscherta e forsa er da nagina fidanza da la publicitad en ils organs da giudicatura.
In ulteriur punct da critica, che pertutga directamain la dretgira, sa referescha a l'audiziun da l'unfrenda il november 2024. Lura aveva in derschader dumandà la praticanta sch'ella n'avess betg pudì sa defender e struclar ensemen pli fitg las chommas per evitar la violaziun. Quai ha alura dà protests ed ina demonstraziun a Cuira: «il turpetg sto midar vart», è stà scrit per exempel sin ils transparents.
Co vai vinavant?
La Dretgira superiura sto decider anc ina giada davart il cas. Fatg è dentant, uschia da leger online tar «Inside Justiz», er sch’ins decida pli strict che la dretgira regiunala, dess quai tenor experts probabel ina reducziun da la sentenzia u dal chasti – quai pervia dal temp ch’i ha duvrà fin ad in nov process.
Cun quest segund spustament resta il cas vinavant pendent e l'attenziun publica sin la giustia grischuna resta gronda.