Malgrà che las pendicularas grischunas han cumenzà la stagiun d'enviern cun il segund meglier resultat dals davos diesch onns, resta la prognosa per l'onn intscherta. Quai pervia da la guerra en l'Europa, pervia da las escalaziuns en il Proxim Orient, dentant era sfidas economicas sco l'inflaziun ed il ferm franc svizzer, manegian ils represchentants e las represchentantas dal turissem.
Damain osps da l'Europa
Cunzunt la situaziun economica procuria ch'ils osps europeics – cunzunt quels che na fetschian betg vacanzas da luxus – manchian, di er il cusseglier guvernativ e minister d'economia Marcus Caduff.
Persuenter vegnian ins dentant a pudair beneventar osps da pli lunsch davent:
Jau sun pertschert che nus vegnin ad entupar dapli osps da l'America u da l'Asia – cunzunt la stad.
Mancanza da persunal è sa meglierada in zic
Er in'autra problematica para d'esser sa calmada in zic – quella da la mancanza da persunal en la gastronomia. Sco Franz Sep Caluori, il president da Gastro Grischun, di, hajan blers optimà lur manaschi, fatg pli attractiv el e pudì beneventar lavurants e lavurantas dad auters chantuns sco per exempel da Son Gagl u da la Turgovia.
Sco i guarda la finala ora la fin da la stagiun na san era ils turistichers e las turisticras betg. E quai malgrà il bun cumenzament d'enviern.
