Siglir tar il cuntegn

Header

video
Il president da Pendicularas Grischun Martin Hug po trair ina buna bilantscha
Or da Telesguard dals 02.01.2024.
laschar ir. Durada: 2 minutas 13 Secundas.
cuntegn

Pendicularas Grischunas Segund meglra stagiun dapi 10 onns ha cumenzà

Las pendicularas grischunas han cumenzà la stagiun d'enviern cun radund 20% dapli giasts che l'onn passà, quai mussan las novas cifras da l'organisaziun da la branscha. Cunquai hajan las pendicularas lantschà la nova stagiun cun il segund meglier resultat dals ultims 10 onns.

Radund in tschintgavel dapli entradas annunzian las Pendicularas Grischunas. Cumpareglià cun l'onn passà han cunzunt la Surselva ed il Grischun central gì in bun cumenzament da la stagiun.

L'augment en questas regiuns giascha tenor l'organisaziun da branscha vi da las bunas pistas tar territoris mesauns e pitschens. A Tavau Claustra haja er dà dapli visitadras e visitaders da l'exteriur. L'Engiadina'Ota n'haja la stagiun passada betg gì tantas diminuziuns, perquai saja l'augment quest onn er betg uschè aut.

L'«aura da terrassas» haja er manà tar bunas svieutas en la gastronomia. Ed er las purschidas sper la pista sajan vegnidas visitadas bain, scrivan las Pendicularas Grischunas en ina communicaziun a las medias.

Svieuta na vegn betg tradida

Plinavant ha l'organisaziun da branscha annunzià da betg pli communitgar la svieuta en ses monitoring da l'entschatta da stagiun. Pervia dals pretschs dinamics na possia ins betg pli cumparegliar ils gudogns cun auters onns. Da nov vegn la svieuta ed il retgav mo pli la communitgà la fin da l'onn.

Las entradas durant ils dis da festa muntan a 20% enfin 25% dal retgav total da las Pendicularas Grischunas. La partenza en la stagiun da quest onn saja pia stada «plaschaivla», scrivan ellas.

La volatilitad saja considerabla. L'enviern passà hai dà 19% pli paucas entradas, quel avant saja stà sin il nivel d'avant corona (e 28% pli aut che durant corona). Las entradas actualas sajan il segund-bun resultat dals davos diesch onns.

RTR novitads 16:00

Artitgels legids il pli savens