La purschida d'applicaziuns d'aura en Svizra è fitg gronda. I dat apps gratuitas, da quellas che custan e lura puspè autras ch'èn internaziunalas. Ma co tscherner la meglra per ils agens basegns? I dat numnadamain betg be bleras apps d'aura mabain er bleras bunas apps d'aura. I dependa tge ch'ins vul.
Quests puncts vali da resguardar
En general vala: Pli lunsch ordavant che la prognosa vegn fatga e pli malsegira ch'ella è. Prognosas propi bunas pon ils meteorologs far be radund tschintg dis ordavant. Sin prognosas che van sur duas emnas, na pon ins betg sa laschar. Perquai na fan apps sco quella da SRF Meteo u MeteoSvizra per exempel betg prognosas pli lungas.
I dependa dentant er da las datas e danunder che quellas vegnan. MeteoSvizra ed SRF Meteo rimnan atgnas datas sur lur atgnas staziuns d'aura. Quellas èn bler pli exactas che las datas da las staziuns europeicas, surtut er cura ch'i va per l'aura a curta vista. Sa chapescha pon ins er ir a guardar la previsiun da l'aura sin Google u prender quella ch'è gist sin il telefonin dad Android u iPhone. Dentant n'èn quellas, guardà local, mai uschè exactas sco quellas dals purschiders che dovran datas localas. Gist en in pajais muntagnard sco la Svizra fa quai ina gronda differenza. Là fan ils meteorologs adina puspè correcturas.
Apps da vaglia
Sco gia menziunà, dependi in zic dal gust, tge app ch'ins vul la finala duvrar. Uschia è quella da SRF Meteo localmain ferma, er il radar da plievgia da SRF è fitg bun e fitg precis, perquai ch'el sa basa sin las datas localas. Là èsi plitost ina dumonda da layout, sche quel da la app da SRF plascha u betg. Da principi è la app dentant fitg simpla da duvrar ed i dat er da leger ils artitgels che la redacziun da Meteo scriva.
Ma er las apps da MeteoSvizra e da la Landi sa basan sin datas localas ed èn perquai er exactas. Lur avantatg è plitost quel ch'ellas mussan dasper l'aura er anc ulteriurs privels. Uschia per exempel il privel d'incendis da guaud, aua gronda u er mal'auras. Quai n'inditgescha l'app da SRF betg.
Tge fa l'aura a l'Open Air Lumnezia?
Ed uss vegn la prognosa: Ma, quella è differenta tar tuttas trais applicaziuns. Uschia inditgescha MeteoSvizra ch'i duai vegnir a plover venderdi suentermezdi / saira. La app da Landi di ch'i vegnia a dar urizis la sonda suentermezdi / saira ed SRF mussa ch'i dettia venderdi sin sonda notg in zic plievgia.
