Siglir tar il cuntegn

Header

video
L'avegnir da Hochwang
Or da Telesguard dals 26.01.2024.
laschar ir. Durada: 4 minutas 57 Secundas.
cuntegn

Arosa I dat speranza per il territori da skis da Hochwang

Per che las pendicularas da Hochwang curseschian puspè il proxim enviern dovri anc var 200’000 francs – ed ina votaziun a l’urna che pudess avair lieu gia la stad.

En il territori da skis da Hochwang sa mussa in maletg nunusità per l'enviern. Igl ha bain naiv, ma ir cun skis na pon ins betg. Il territori da skis è serrà.

Igl è ina trista vista. Tanta naiv, dentant èn las sutgas per terra e las pendicularas stattan airi.
Autur: Peter Beeli Gruppa da project «Neustart Hochwang»
audio
Hochwang – in territori da skis serrà
ord Actualitad dals 26.01.2024. Maletg: RTR
laschar ir. Durada: 4 minutas 32 Secundas.

Peter Beeli vul salvar las pendicularas. Per che la serrada restia in'excepziun tschertga e rimna la gruppa «Neustart Hochwang» daners. Tenor la gruppa d'interess dovri 800'000 francs per insumma pudair cuntinuar cun las pendicularas – e quai enfin la fin d’avrigl. La finamira da 800'000 francs tanschess tenor Beeli da la gruppa da project per 5 onns.

Nus na vulain betg stuair rimnar mintga dus onns daners. Cun 800'000 pudain nus manar tschintg onns las pendicularas.
Autur: Peter Beeli Gruppa da project «Neustart Hochwang»

Revisiun parziala da la lescha da turissem d'Arosa

Per salvar las pendicularas Hochwang a lunga vista dovri dapli che mo daners. Tenor Peter Beeli duvrassi er in auzament da las taxas turisticas che purtassan mintg'onn radund 150'000 francs supplementars en la cassa. Per che quai saja insumma pussaivel, dovri dentant ina revisiun parziala da la lescha da turissem d'Arosa. Quel process è ussa en lavur. Il davos pled en chapitel ha la populaziun d'Arosa.

Entant patescha la gastronomia

Ch'il territori da skis è serrà, senta era la gastronomia. Ina chamona pertutgada ch'è a l'ur dal territori da skis è la chamona Hochwang. Marco Schwendener che maina la chamona ha decis da laschar avert, er sch'il territori da skis è serrà. Sch'i renda vesia el la fin da la stagiun, di Schwendener. Vinavant saja la vischnanca d'Arosa vegnida encunter ad el cun ils tschains. Er ils possessurs dal «Hotel Tanne» èn vegnids encunter cun ils tschains a la manadra dal hotel Claudia Burkhardt. Stretg vegni per part però tuttina.

Fin uss n'èsi betg segir sch'ins po salvar il territori da skis. Sper donaziuns ed adattaziuns da la taxa turistica è Peter Beeli gia a la tschertga da persunal. Pir cura che tut las trais finamiras – finanzas, taxa turistica e persunal – èn cuntanschidas, vegn il territori Hochwang ad avair ina schanza. In plan B na dettia quai betg.

RTR actualitad 17:00

Artitgels legids il pli savens