«Nagina plazza per violenza»
Er il minister da giustia e segirezza dal grischun, Peter Peyer, ha prendi posiziun davart l'attatga a Tavau. El ha giavischà a l'unfrenda tut il bun e spera ch'ella sa remetta spert. Il cusseglier guvernativ ha lura condemnà l'attatga e ditg ch'il Grischun na tolerescha betg violenza, tuttina ord tge motivs. Plinavant saja deplorabel che persunas cun dretg da giast – quai che requirents d'asil han – vegnan chastiabels.
Per uschè acziuns criminalas na datti naginas stgisas – er sche las persunas èn sez en ina situaziun difficila.
Tar las persunas suspectadas sa tractia da requirents d'asil che spetgan sin la repatriaziun. Sch'igl n'è betg pussibel da repatriar els directamain – per exempel sch'i na dat nagin pass u documents uffizials – hajan quels il dretg da sa tegnair si qua.
Arrestà dus persunas cun «suspect ferm»
Gia la notg dal delict haja la polizia chantunala arrestà duas persunas. Quai ha la polizia chantunala confermà envers RTR. I sa tracta da dus requirents d'asil da 24 e 29 onns ch'èn refusads e spetgan sin la repatriaziun. Els hajan sa depurtà a moda suspectusa ed sajan lura vegnids arrestads.
Tenor la polizia dettia uss, suenter emprimas inquisiziuns, il suspect ferm ch'i hajan commess il delict. Ultra da quai marschan investigaziuns en connex cun auters delicts da la medema notg. Cumprovà n'è dentant anc nagut – i vala la presumziun d'innocenza.
Tge è capità?
Il gidieu ortodox – ch'è in turist da Londra – era tenor atgnas indicaziuns vi da passar a Tavau per lung da la promenada bandunada, cura ch'ils dus umens hajan attatgà el. Pliras giadas hajan quels pitgà en fatscha e spidà sin el. El haja empruvà da fugir, ma ils dus attatgaders sajan currids suenter ad el – quai fin en la vischinanza da l'hotel Bellvedere. Là haja il giuven clamà a la glieud tar l'hotel da telefonar a la polizia. Sinaquai sajan ils dus attatgaders la finala scappads.
Els han cumenzà a spidar sin mai e sbragì «Free Palestine». Alura hai jau intimà la glieud enturn l'hotel da clamar la polizia. Cura ch’els han udì quai èn els scappads.
La polizia chantunala ha confermà ch'i saja vegnì purtà plant davart l'incident. Quel haja tenor il giuven gidieu cuzza fin set miutas.
Ina nova dimensiun d'antisemitissem en il Grischun
Era sch'i ha adina puspè dà conflits tranter gidieus ortodox ed ils indigens a Tavau, n'haja quest cas betg da far insatge cun il lieu da turissem, manegia Jonathan Kreutner – secretari general da la Federaziun svizra da las communitads israelitas (SIG).
Quai ch'jau sai per il mument è ch'i n'ha nagin connex cun la preschientscha da gidieus ortodox a Tavau. Mabain cun la situaziun mundiala e la situaziun actuala en il Proxim Orient.
«Free Palestine» hajan ils dus delinquents tranter auter clamà durant l'attatga. In appell pia da deliberar la Palestina ch'è actualmain en in conflict armà cun l'Israel. Per Jonathan Kreutner èsi cler, ch'il giuven turist è vegnì attatgà en quest cas sulettamain perquai ch'el è in Gidieu – quai avess pia pudì capitar dapertut. Talas attatgas antisemiticas dettia tenor Kreutner adina pli savens dapi ils 7 d'october, cura che la Hamas ha attatgà l'Israel.
Jonathan Kreuter e la victima da l'attatga pretendan che la polizia procuria per dapli segirezza. Philipp Wilhelm – il landamma da Tavau – ha communitgà a scrit ch'i na dettia nagin plaz a Tavau per persunas ch'attatgan autras persunas pervia da lur religiun u derivanza.
