Per che novs peschs na vegnan betg en contact cun il tissi PCB ch'ha contaminà l'aua dal Spöl han ins dischlocà els en ina part dal flum che sa chatta pli a val. Quai han ins ussa fatg avant che ils peschs cumenzan a fregar.
Per pivs u vulps che maglian ils peschs contaminads è la quantitad da PCB anc adina in problem.
La contaminaziun dals peschs n'è per ils umans betg pli privlusa, ma per animals che maglian grondas quantitads da quels peschs saja quai anc adina in privel.
Sper la dischlocaziun dals peschs ha era cumenzà la construcziun per ina installaziun nua ch'ins vul a partir da la proxima primavaira lavar il material dal letg dal flum. Quest material vegn lavà e sortì. Ils graunins pli pitschens che dus millimeters èn il pli ferm contaminads dal PCB. Quels vegnan alura transportads en in indriz spezialisà per vegnir refundids.
PCB èn cumbinaziuns da clor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch'èn vegnidas scumandadas il 2001.
Las Ovras electricas Engiadina fan quint cun in temp da sanaziun dal Spöl da duas stagiuns da construcziun. Ils custs da la sanaziun sa summeschan sin plirs milliuns. Tgi che ha lura da pajar quels quints vegn anc discutà tranter las Ovras electricas Engiadina e la firma da construcziun ch'è responsabla per il tissi en il Spöl.