Quest enviern era flaivel, silmain quai che pertutga naiv. Tenor Luzian Schmassmann, meteorolog tar SRF Meteo, datti dus motivs daco ch'igl ha actualmain uschè pauca naiv. Dad ina vart saja il december stà fitg sitg.
En Grischun hai gì per part mo la mesadad da las precipitaziuns ch'ins avess spetgà en media.
Da l'autra vart saja las temperaturas memia autas. Fertant ch'il december ha cumenzà fraid, èsi vegni adina pli chaud. Il cunfin da naiv è s'augmentà, plinavant hai pluvì. Quella cumbinaziun haja «maglià davent» la naiv existenta. Er en regiuns pli autas, pia sur 2'000 meters sur mar, hajan ins mesirà temperaturas fitg autas. La situaziun da naiv saja en autras regiuns da la Svizra dentant anc pli flaivla ch'en Grischun, di il meteorolog sin dumonda da RTR.
«Mo in pèr flocs» fin Silvester
Da gievgia fin venderdi passan tenor SRF Meteo intginas frontas sur la Svizra. Quellas pudessan purtar in pau naiv nova. Per gronda part passan quellas frontas sper il Grischun via. Sch'i dat insumma naiv en Grischun, lura mo «in pèr flocs». Dentant er quels na vegnan a restar ditg.
Fin la fin da l'onn vegni adina pli chaud. Sin 2'000 meters sur mar quintan ins cun fin 9 grads. Il cunfin da naiv s'augmenta, plinavant datti favugn. La pauca naiv existenta vegnia a partir vinavant, uschia Luzian Schmassmann.
