Las temperaturas dal fanadur èn quest'onn stadas sut la media. Surtut en il Grischun èsi stà 1° pli fraid che la media. La pli gronda differenza tar la media hai tenor Jürg Ackermann dad SRF Meteo dà en l'Engiadina Bassa. A Scuol saja stà 1,7° pli fraid che la media. Mo era sche las temperatruas sajan sut la media, sajan ins lunsch naven da records.
Las uras da sulegl da quest fanadur èn 20% sut la media dals ultims 30 onns. Ed igl è er pli savens vegnì bletsch che usità. Uschia haja dà quatter fin set dis da plievgia dapli che fiss da spetgar. Er hai dà 30% fin dubel uschè blera plievgia.
Il pli bletsch èsi stà en Surselva ed Engiadina Bassa.
A Mustér hai durant il mais da fanadur dà passa 180 mm plievgia – quai tar ina media da circa 100 mm. A Scuol hai cun 140 mm dà in nov record da plievgia - tar ina spetga da 80 mm. Talas cundiziuns meteorologicas na sajan betg anc extraordinarias per in mais da stad. L'extraordnari saja che la situaziun sa tegnia usche ditg.
L'avust spetga il return da la stad
Schebain che far ina prognosa per l'entir mais d'avust ha Jürg Ackermann dad SRF Meteo er bunas novas: Ils models mussian ch'i pudess gia l'emprim'emna da l'avust dar ina midada tar aura da stad pli stabila. Uschia pudessi per in u l'auter schizunt puspè vegnir memia chaud.
