Venderdi saira è il cunfin da naiv crudà sin 2'500 meters, sonda lura perfin sin fin 1'200 meters sur mar, di Roman Brogli dad SRF Meteo. Uschia èsi er da quintar cun naiv sin las vias dals pass. Fin dumengia vegn sur 2'000 meters quintà cun 20 fin 50cm naiv nova, local èn schizunt 80cm pussaivel.
Als blers lieus na vegn la naiv betg a restar ditg. Per l'ina è la terra anc memia chauda e la naiv lieua spert, per l'autra na vegn il mument betg spetgà dapli naiv.
L’entschatta da l’enviern en las muntognas da questa stagiun è normala. La data mesauna per l’emprima naiv mesirabla è per Arosa ils 16 da settember. L’entschatta da l’enviern da quest onn po dentant parair baud perquai ch’igl è stà fitg ditg chaud.
Favugn en il sid
Cun nagina naiv èsi dentant da quintar ils proxims dis en il sid dal chantun. Là buffa a partir da venderdi vent dal nord, uschia ch'i fa er sonda pulit bell'aura. Il favugn po furiar cun 60 fin 100 km per ura.
Er l'emna proxima resti frestg
Las temperaturas en il nord da las Alps restan bassas per plirs dis. Davent da dumengia èn las temperaturas maximalas en la bassa sin 16 grads e las temperaturas minimalas sin 5 fin 8 grads. Local pudessi era dar ina schelira dal terren. Pir la fin da l'emna proxima vegni puspè in zic pli chaud.
