Tgi che passenta ils dis sur l'Ascensiun en il conturn da Cuira ha la gievgia da far quint cun in di nua ch'i plova mo ina giada - betg uschè ferm, ma constantamain. Ils proxims dis èn previs in zic plievgia ed in tschiel nivlus. Las temperaturas sa movan tranter 10 ed 15 grads durant il di.
Sumegliant vegn l'aura ad esser en il conturn da Donat en la Val Schons, a Mustér en Surselva ed a Santa Maria en Val Müstair. En tuts trais lieus duai plover da gievgia fin sonda u dumengia tar ina temperatura d'enturn 10 grads.
Dapli sentiment d'enviern pudessan survegnir las persunas che passentan l'Ascensiun en l'Engiadina u a Tavau. Tenor SRF Meteo vegni a plover e perfin naiver a partir da la gievgia enfin la dumengia. Las temperaturas restan tenor prognosa durant il di sur nulla enfin 6 grads.
Tranter 1000 e 1500 meters sur mar poi schizunt dar naiv. Attenziun per tut tgi che ha gia midà sin pneus da stad.
L'aura sa mida dentant adina puspè – pervia da quai èsi il meglier da dar in sguard sin la previsiun da l'aura mintga giada avant ch'ir or da porta.
Ils sontgs da glatsch arrivan era quest onn
Or da l'experientscha agricula durant tschientaners cun scheliras da primavaira è resultada la tradiziun dals sontgs da glatsch. La regla da l'aura che duai cumparair tscherts dis da matg na sa lascha dentant betg confermar quest onn cun las mesiraziuns da MeteoSvizra. Tuttina pon ins observar regularmain dis da schelira durant l'entir mais da matg. Temperaturas bassas la primavaira muntan en spezial in privel per l'agricultura. Donns vi da chatschs giuvens e plantas pon chaschunar ina perdita considerabla per la rendita.
Tenor las descripziuns dal temp medieval crodan ils sontgs da glatsch en l'Europa centrala sin ils dis dals 11 fin ils 14 da matg. Quai èn ils dis da num da Mamertus, Pancratius, Servatius e Bonifatius. Sco finiziun da questa fasa fraida vegn la finala numnada la Sofia fraida dals 15 da matg.