Siglir tar il cuntegn

Header

cuntegn

Aura turbulenta Bler naiv, ferm vent ed in grond privel da lavinas

Suenter blers dis arriva la naiv puspè. Tenor Nicole Glaus da SRF Meteo datti cunzunt bler naiv en il Grischun dal Nord ed en il Grischun Central. En la Surselva, il Partenz e l’Engiadina Bassa datti enfin mesemna, fin ad in meter naiv. En las ulteriuras regiuns datti tranter 10 enfin 50 centimeters naiv. Sulettamain en las valladas da sid resti sitg u dat be pauca plievgia.

Privel da fieu en las valladas dal sid resta

Il scumond da far fieu en las valladas dal sid vegn a restar. Il privel da fieu na vegn betg sminuì. Era sch’i po plover na vegnia betg a dar avunda per calmar la situaziun, di Nicole Glaus da SRF Meteo envers RTR.

Ferm vent

En l’entir chantun èsi da quintar cun fitg ferms vents. En lieus pli bass poi dar suffels da stemprà enfin 80 km/h. En la muntogna poi dar orcans enfins 150 km/h. En las valladas dal sid buffi era fitg, là dentant il vent dal nord, e quel era enfin 110 km/h.

audio
Tge munta la prognosa da naiv ord vista lavinas (SLF)
ord Actualitad dals 31.01.2022.
laschar ir. Durada: 2 minutas 20 Secundas.

Grond privel da lavinas – stgalim 4 da 5

 Pervia da la blera naiv s’augmenta il privel da lavinas en il chantun Grischun davent da moderà, stgalim 2, sin grond, stgalim 4 da 5.

 Lavinas pon ir libras da sezzas.
Autur: Frank Techel prognosticher da lavinas a l'institut per la perscrutaziun Tavau

Sin quest stgalim pon lavinas era ir libras da sezzas. Perquai che la naiv nova crodia sin ina cuverta da naiv dira, na sa collia la nova naiv betg cun la veglia ed uschia possia ella glischnar davent spert e furmar ina lavina. Perquai avertescha Frank Techel da l’Institut da naiv e lavinas a Tavau, da be ir sin pistas avertas cun skis ed aissa e betg ir dasper las pistas.  

Pendicularas ston serrar indrizs en ils auts

Er las pendicularas cumbattan cun l’aura. Pervia dals ferms vents en ils auts han ellas stuì serrar divers implants, cunzunt quels sur 2000 meters sur mar. Quai conferman ils territoris da skis sin dumonda dad RTR. Stefan Arnold, il directur dallas pendicularas Mustér di ch’els hajan gia oz stuì serrar ina gronda part dals indrizs e quai vegnia er ad esser il cas ils proxims dis. Tuttina sajan els leds ch’i dettia uss finalmain naiv. Quella avess dentant gugent pudì vegnir avant, cunquai che divers chantuns han gia quest’emna vacanzas da sport. I saja donn per ils giasts che sajan uss gia en la regiun.

Sumegliant tuni er tar las pendicularas Scuol Motta Naluns. Sco il directur Andri Poo di, tegnian ins en egl la situaziun e serria lura indrizs sche necessari. Dentant er el punctuescha ch’ins saja led ch’i dettia uss finalmain naiv.

Ed er tar l’Arena Alva a Laax han ins gia oz stuì serrar divers indrizs en ils auts ed er ils proxims dis quinta Corsin Clopath, il schef da segirezza ch’almain tut quai ch’è sur 2000 meters sur mar stoppia vegnir serrà pervia dals ferms vents. Ins haja gia fatg ils plans per ils proxims dis. Gievgia, cura che l’aura duai puspè vegnir meglra, vegnian ins lura a far sgols per guardar la situaziun ed er per sajettar lavinas. Uschia ch’il territori da Laax po lura esser pront per la fin d’emna. 

RTR actualitad 17:00

Artitgels legids il pli savens