- Cunter la Banca Chantunala Grischuna e sia societad affiliada banca BZ è vegnì purtà in plant.
- L'accusader privat pretendia ina summa da plirs tschient milliuns francs, sco igl ha num en ina communicaziun da la GKB.
- Da l'accusader privat sa tractia tenor rapports da l'agentura da novitads AWP da l'investur Remo Stoffel.
- I giaja per ina relaziun cun clients ed in product d'investiziun che la societad affiliada administreschia.
- Per la GKB e la banca BZ èn las renfatschas nunfundadas – las duas bancas vulan sa defender correspundentamain.
- La regenza grischuna prenda per enconuschientscha ils schabetgs ed observa vinavant quels.
Davos in plant d'indemnisaziun en autezza da plirs tschients milliuns francs cunter la Banca Chantunala Grischuna e sia figlia banca BZ stat l'investider grischun Remo Stoffel. Ina pledadra da sia firma Priora Suisse ha confermà d'avair inoltrà ina dumonda da mediaziun en connex cun il plant.
Il plant sa drizzia cunter la GKB e la banca BZ en connex cun l'emissiun d'aczias cun dretg da votar tar la United Machining Solutions SA il schaner 2024, ha la pledadra communitgà il mardi.
En il rom da quest augment da chapital a maun d'aczias cun il dretg da vuschar haja la banca BZ / GKB sco administratura da la facultad desistì dal dretg da cumpra, quai a disfavur dals investiders existents – tranter quels er Stoffel.
Accusader era l'emprim anc betg enconuschent
Ina tala summa è fitg auta per la Banca chantunala grischuna, sch'ins conguala quella cun ils gudogns annuals che la banca ha fatg ils ultims tschintg onns. Lezs muntan mintgamai tranter 200 e 230 milliuns francs.
Detagls davart il plant ed il cuntegn da quel n'ha la GKB betg communitgà, be tant: Il plant saja vegnì inoltrà sco dumonda da mediaziun tar l’Uffizi da mediaziun Höfe a Freienbach en il chantun Sviz e renfatschia a la GKB, a sia societad affiliada banca BZ, sco er ad organs responsabels actuals e dal passà da la banca BZ d'avair violà lur duairs.
Quai di la regenza grischuna
Las finanzas dal chantun Grischun dependan dal success da la Banca chantunala grischuna. Che la banca fa ses duair sto la regenza grischuna survegliar. Perquai fai er pauc surstar ch'il plant fatschenta er il minister da finanzas grischun, Martin Bühler. I saja cleramain deplorabel dad udir dal plant, ma ins na sappia il mument anc betg ils detagls, uschia il minister da finanzas da la regenza.
En il mument na po ins betg dir bler, igl è da spetgar la procedura legala.
Ils ultims onns ha la cassa chantunala adina profità dal success da la Banca chantunala, concret cun 100 milliuns francs. Tge che capita, sche l'accusader avess d'avair success, na san ins actualmain anc betg dir. Ed uschia na possian ins anc betg calcular tge consequenzas ch'il cas pudess avair. Ins haja da spetgar, il budget 2027 saja en lavur ed en il rom da quel possian ins far ina valitaziun da la situaziun pli exacta. Il mument saja il plant in factur da malsegirezza.
Fin ch'igl è cler tge ch'i dat or da quest plant pudessi anc ir onns. Observar l'entira istorgia vul Martin Bühler era uss – sco autoritad da surveglianza ed era perquai che la GKB profitescha da la garanzia chantunala dal stadi.