- Cunter la Banca Chantunala Grischuna e sia societad affiliada banca BZ è vegnì inoltrà in plant.
- L'accusader privat pretendia ina summa da plirs tschient milliuns francs, sco i ha num en ina communicaziun da la GKB.
- I giaja per ina relaziun cun clients ed in product d'investiziun che la societad affiliada administreschia.
- Per la GKB e la banca BZ èn las renfatschas nunfundadas – las duas bancas vulan sa defender correspundentamain.
Ina tala summa è fitg auta per la Banca chantunala grischuna, sch'ins metta en relaziun cun ils gudogns annuals dals ultims tschintg onns che muntan mintgamai tranter 200 e 230 milliuns francs.
Detagls davart il plant ed il cuntegn da quel n'ha la GKB betg communitgà, be tant: Il plant saja vegnì inoltrà sco dumonda da mediaziun tar l’Uffizi da mediaziun Höfe a Freienbach en il chantun Sviz e renfatschia a la GKB, a sia societad affiliada banca BZ, sco er ad organs responsabels actuals e dal passà da la banca BZ d'avair violà lur duairs.
Deal pli grond sco raschun per il plant?
Tenor in rapport dal portal online Inside Paradeplatz pudess in deal pli grond esser la raschun per il plant. I giaja per la vendita da Agie Charmilles, ina anteriura societad affiliada dal concern Georg Fischer a la United Grinding Group, nua che Ebner è acziunari principal.
La banca BZ haja persvas l'accusader ed ulteriurs clients privats da desister dal dretg da retrair daners en il rom d'in augment da chapital a maun d'aczias cun il dretg da vuschar. Uschia haja quella clientella pers daners. Plinavant crititgescha l'accusader tenor Inside Paradeplatz la valitaziun da la firma. Ils responsabels hajan tegnì bass artifizialmain il pretsch da las aczias cun agid d'ina furmla interna da calculaziun da la banca BZ.