Siglir tar il cuntegn

Header

audio
Per tadlar: la decisiun da l'Uvestgieu Cuira
Or da Actualitad dals 02.12.2022. Maletg: Keystone
laschar ir. Durada: 3 minutas 44 Secundas.
cuntegn

Betg pli stgatschar il diavel L'uvestgieu a Cuira stritga la plazza da l'exorcist

L'uvestg Bonnemain na lascha betg pli far exorcissems gronds. I dettia autras pussaivladads.

Il favrer 2020 è Christoph Casetti mort a Cuira en la vegliadetgna da 76 onns. Cun agid d’in crucifix, d’aua benedida e d’in cudesch d’uraziun ha el deliberà onns a la lunga persunas da nauschs spierts, da demunis u schizunt dal diavel.

Uss èsi cler: Christoph Casetti è per il mument l’ultim exorcist ch’è stà engaschà en l’uvestgieu da Cuira. Per motivs religius na po l’uvestg da Cuira, Joseph Maria Bonnemain, betg excluder che demunis u ch’il diavel fetschian er en il Grischun lur malesser. Il post d’exorcists, ch’è vegnì liber cun la mort da Casetti, na vegn el dentant betg pli ad occupar da nov.

Schliaziuns normalas vegnan preferidas

Bonnemain n’è betg mo teolog, el è er medi. Per el èsi cler: il tractament da persunas ch'èn supponidamain malspiertadas sto sa midar.

Per la gronda part dals problems na stuain nus betg tschertgar raschuns extraordinarias.
Autur: Joseph Maria Bonnemain uvestg da Cuira

Tuts sajan persunas cun fermezzas e flaivlezzas ch’hajan en la vita mintgatant difficultads. Tgi ch’è confruntà cun situaziuns socialas, professiunalas u cun situaziuns da sanadad difficilas, per las qualas dettia soluziuns normalas. Per el munta quai: agid medicinal, psicologic u psicoterapeutic.

audio
Bonnemain davart metodas adattadas
ord RTR Audio dals 25.11.2022.
laschar ir. Durada: 24 Secundas.

Per l'uvestgieu da Cuira è quai ina nova vista.

Anc avant tschintg onns ha l’expert da religiun Georg Schmid numnà l’uvestgieu da Cuira en il magazin d’infurmaziun da SRF Rundschau «Mecca d'exorcissem». I dettia umans da la Germania che na survegnian nagin exorcissem en lur agens uvestgieus e vegnian perquai a Cuira per laschar s'exorzar là. «Ins pudess dir che l’uvestgieu da Cuira è l’eldorado da l’exorcissem en il spazi linguistic tudestg, in hotspot da l’activitad exorcistica, gist in lieu da pelegrinadi per persunas che tschertgan exorcissems», ha ditg Schmid quella giada a la televisiun.

Oz è sa midà bler vi da la curt episcopala a Cuira. Da papa Francestg ha il nov uvestg Joseph Maria Bonnemain survegnì l’incumbensa da deliberar l’uvestgieu da la dispita da direcziun da decennis tranter catolics conservativs e moderads. La renunzia a futurs excorcissems saja en quest connex in pass vers la normalisaziun, di Bonnemain en l’intervista cun il schurnal regiunal dal Grischun.

En sia carriera da 45 onns en la baselgia catolica, na saja l’uvestg sez mai vegnì confruntà cun ina persuna nua ch’i saja stà necessari da far in grond exorcissem:

En la gronda part dals cas ha la glieud simplamain grevezzas da l'olma u psichicas. Els basegnan alura il sustegn, uraziuns, ina benedicziun u servetschs divins adattads. Ma betg exnum in grond excorcissem.
Autur: Joseph Maria Bonnemain uvestg da Cuira

Exorcissem grond u pitschen?

Avrir la box Serrar la box

La Baselgia catolica distingua tranter l'exorcissem pitschen ed il grond.

Tar l’exorcissem pitschen uran las persunas pertutgadas babnoss – e là en spezial ils pleds «e schlian il mal».

Tar l'exorcissem grond vegn sa drizzà directamain als nauschs spierts. Utensils ils pli impurtants en il cumbat cunter il mal èn il crucifix, in cudesch d’uraziun ed aua benedida. L’exorcist sto però l'emprim sclerir sche la persuna pertutgada haja in problem psichic – era cun agid d’experts medicinals. Ed era l'uvestg sto en mintga cas approvar l'exorcissem.

L'agid per persunas en miserias da l'olma cuntinuescha

Pia na duess l’uvestgieu da Cuira pli esser spezialmain attractiv per persunas che tschertgan in exorzissem. Ma: ils cartents en miseria psichica duain er vinavant pudair sa drizzar a sacerdots en l’uvestgieu da Cuira. Quels pon render consolaziun ma era renviar las persunas pertutgadas a persunal medicinal spezialisà, sch’i fa da basegn. Uschia s'approximescha l’uvestgieu da Cuira pli datiers a l’uvestgieu da Son Gagl. Là n'è l'exorcissem gia da ditg nagin tema pli.

A Basilea, en il terz uvestgieu per gronda part tudestg, cusseglian dus spirituals ch’èn numnads da l’uvestg en l’uschenumnà «servetsch da liberaziun» las persunas pertutgadas. In dad els, l'emerità uvestg Martin Gächter di sin dumonda, ch’el haja fatg en 30 onns sulettamain in exorzissem grond. Dapi ch’i na dettia betg pli uschè spert in exorcissem en l’uvestgieu da Cuira, sajan las dumondas dentant s’augmentadas tar el.

RTR novitads 12:00

Artitgels legids il pli savens

Scrollar a sanestra Scrollar a dretga