La chasa da dunnas a Cuira ch'è vegnida fundada dal 1989 è cun sias trais chombras plitost pitschna. Quai hajan els badà l’onn passà, cur ch’els han gì dubel uschè bleras annunzias che l’onn avant, di la manadra da la chasa Annemarie Grünig. La chasa èra bunamain adina plaina ed els hajan stuì refusar passa 100 dunnas ed uffants e tschertgar alternativas.
Nus avain gì in'occupaziun durabla da var 80% – 90%.
Il motiv per quest augment saja stada la fin da la pandemia e da las regulaziuns. Annemarie Grünig suppona, che las dunnas n'hajan betg gì la pussaivladad dad ir per agid pli baud perquai ch’ellas eran a chasa e vegnivan controlladas tut il temp. Pir suenter la pandemia èn quellas lura vegnidas latiers dad ir per agid en la chasa da dunnas.
I vegn senz’auter avant che nus stuain guntgir sin in hotel perquai che nus n’avain betg avunda plazza.
La manadra da la chasa da dunnas di, che i fiss anc memia baud per dir ch’ins stoppia engrondir la chasa. Sche las cifras restan dentant uschè autas, lura saja da guardar che soluziuns che i dettia. Pervia da las finanzas duvrassa alura tractativas cun il chantun.
