Siglir tar il cuntegn

Header

audio
Orange Days: tge spetga durant quels dis?
Or da Actualitad dals 25.11.2022. Maletg: RTR
laschar ir. Durada: 2 minutas 40 Secundas.
cuntegn

Campagna mundiala «16 dis cunter violenza envers dunnas» èn a fin

La campagna internaziunala va a fin la sonda. Sin modas diversas han las dunnas fatg attent sin femicidis en Svizra.

La sonda chala la campagna cunter violenza da dunnas sin l'entir mund. 200 organisaziuns han fatg attent en radund 190 occurrenzas sin la furma la pli seriusa cunter dunnas: l'assassinat da dunnas, il femicidi. I vegn pretendì dal stadi da stgaffir posts da cussegliaziun per persunas violentas e dapli plaz en chasas da dunnas.

Campagna «16 dis cunter violenza envers dunnas»

Avrir la box Serrar la box

Quai è gia la 15avla giada che quella campagna vegn fatga. En quels 16 dis vegnan manadas tras occurrenzas en l'entira Svizra ed era sin l’entir mund che duain far attent a la violenza envers dunnas. Quai onn è il focus stà sin femicidis.

Femicids capitan era en Svizra

Mintga duas emnas vegn ina dunna assassinada en Svizra, scriva l’organisaziun feministica da pasch. Il 2021 èn 26 dunnas e giuvnas mortas entras violenza a chasa. Savens è il partenari u ex partenari l'assassin. La organisaziun feministica da pasch organisescha la campagna en Svizra. Ella vul far attent cun la campagna sin il femicids, porscher sustegn e promover prevenziun. Ed ella pretenda dal stadi da surpigliar responsabladad e proteger las dunnas da violenza, uschia il messadi da medias.

Dis d'acziun a Cuira

transparent dals orange days a Cuira
Legenda: RTR

Er a Cuira è la campagna vegnida lantschada venderdi ils 25 da november. Cun in stan d'infurmaziun fan il Soroptimist Club Cuira, il Zonta Club Cuira e la secziun grischuna da las academicras svizras attent sin la tematica. Ellas repartan pitschens regals sco per exempel zulprins u culis e flyers per far attent sin la tematica da la violenza encunter dunnas. In grond transparent en la Grabenstrasse duai medemamain far attent sin la tematica.

La finamira è da far attent in e scadin sin la tematica da violenza cunter dunnas.
Autur: Andrea Rofner Secziun grischuna da las academicras svizras

Differentas pasternarias da Maiavilla fin Glion vendan ils 16 dis d'acziun lur products en stgarnuz spezials cun il slogan: «Violenza na vegn betg en il stgarnuz a mi». Sin ils stgarnuz as chatta er numers da telefon impurtants per agid tar violenza a chasa.

Chalzers bandunads sin la plazza da teater

Per far pli visibel la violenza cunter dunnas èn sin la plazza dal teater Cuira mess ora chalzers oranschs. Mintga pèr stat per in femicidi. La colur oranscha è preschenta per quels 16 dis fin ils 10 da december en l'entira citad da Cuira. Differents bajetgs sco per exempel il teater Cuira, il Museum retic u la Biblioteca chantunala vegnan illuminads en oransch per far attent sin la tematica da violenza envers dunnas.

RTR novitads 06:00

Artitgels legids il pli savens

Scrollar a sanestra Scrollar a dretga