Quest onn haja dà dapli traffic da Pasca sin vias grischunas che auters onns, ha manegià Andreas Pöhl da l'Uffizi da construcziun bassa dal Grischun. Quai haja differents motivs: per l'ina la bell'aura che ha motivà blers dad ir en il sid sur ils firads, e per l'autra las vacanzas da primavaira, che han cumenzà en tscherts chantuns il medem mument. Ord vista dal chantun Grischun saja quai dentant stada ina fin d'emna gartegiada, di il planisader da traffic. «Nus avain gì las bloccadas enconuschentas sin la via chantunala», ha ditg Andreas Pöhl. «Quai è dentant in svilup sco quai che nus enconuschain el.»
Per promover dapli la chanalisaziun dal traffic, ha il chantun installà quatter amplas a l'entschatta dals vitgs, tranter auter a Panaduz e Razen. La finamira saja da franar il traffic e dad uschia influenzar ch'ils sistems da navigaziun na mussian betg pli la ruta alternativa sur ils vitgs.
Las amplas en ils vitgs doseschan il traffic ed influenzeschan uschia il temp da viadi.
I saja gartegià, ma influenzà dal tuttafatg n'ha questa metoda anc betg ils navis. Sch'ins è stà sin viadi da Tusaun en direcziun Cuira, lura ha Google Maps tuttina manà il traffic sur la ruta alternativa via Razén – e quai malgrà las amplas. Da quai è er il planisader dal traffic conscient. El declera: «Ils navis na pon betg mesirar il temp da viadi, els pon dar ina recumandaziun mo sin basa dals temps da viadi precedents». El saja dentant da buna speranza che questa metoda fetschia en intgins onns effect e ch'ils navis na sappian betg inditgar questas rutas.
Quai ch'è è ord vista dal chantun stà in success, è la lingia blaua a Domat, ina via mo per indigens ed indigens per franar il traffic tras il vitg. Tenor Andreas Pöhl vegnan els a far quai era en il futur ed era autras vischnancas hajan gia mussà interess per sistems sumegliants, sco per exempel Favugn.
L'Uffizi federal avertescha, ch'igl è er anc da quintar cun bler traffic sin via l'emna suenter Pasca e la fin d'emna dals 10 fin ils 12 d'avrigl.
Lungas colonnas sin la ruta dal San Bernardino, sco er Gottard
Tenor il TCS èsi per part stà da spetgar fin a 40 minutas sin la ruta dal San Bernardino tranter Giuvaulta e Rehanau il Glindesdi Pasca vers nord. Sin la ruta dal Gottard tranter Faido ed Airolo, han colonnas da passa 10 kilometers chaschunà in temp da viadi d'ina ura e mesa pli ditg.
Il venderdi sontg ha laschà crescher las colonnas d'autos sin viadi vers sid sin maximal 21 kilometers. Tranter 3 e 4 uras dapli temp da viadi han questas colonnas muntà per ils automobilists e las automobilistas. La sonda da Pasca era la colonna creschida sin var 6 kilometers.
La pli lunga colonna sin l'A13 il venderdi sontg muntava ad in temp da viadi pli lung dad in'ura e mesa. La sonda èsi stà quiet.
Traffic da guntgida A13 – cun amplas
Per dar dumogn al traffic sin l'autostrada per ils firads da primavaira e las vacanzas da stad ha il chantun installà amplas. Da nov ha mess l'Uffizi da construcziun bassa en funcziun quatter ulteriuras amplas fixas che duain impedir che automobilistas ed automobilists svieschan il traffic sin l'A13 e charreschan tras ils vitgs per lung da l'autostrada.
Sper las amplas ha il chantun er installà posts supplementars da dosar il traffic sin il St. Luzisteig, a Mastrils ed a Fläsch. Là vegn il traffic reglà a maun, scriva l'Uffizi da construcziun bassa dal Grischun. Quest dispositiv vegnia en funcziun tenor basegn.
Plazzal tranter La Punt/Rehanau e Cuira è a fin
Il plazzal sin l'A13 tranter La Punt/Rehanau e Cuira ch'ha impedì il traffic las ultimas emnas è svanì. Sin dumonda da RTR ha l'Uffizi federal da Vias (ASTRA) ditg che las lavurs sin quest tschancun da l'A13 sajan a fin. Las lavurs per lung l'autostrada vegnian fatgas en etappas.
Per la proxima etappa da lavurs vegnia installà il plazzal tranter Cuira-Nord e Zezras. Ins haja organisà las etappas uschia, ch'i na dettia nagins impediments supplementars durant ils dis da Pasca.
Per laschar passar pli svelt las uras en colonna: