Las regenzas dal Grischun e dal Tirol dal Sid èn s'inscuntradas oz a Bolzano. Il president da la regenza dal Tirol dal Sid Arno Kompatscher ha intunà, che la duas regiuns haja ina colliaziun istorica, culturala e politica tras lur cunfin cuminaivel,
Sin l'agenda èn stads discurs davart differents temas sco la re-valurisaziun dal Pass dal Stelvio, il stand actual dal studi davart la colliaziun da tren en la regiun «Terra Raetica» che pudess colliar il Tirol dal nord e sid, il Grischun a la Lumbardia, scriva l'Uffizi da Pressa dal Tirol dal Sid.
Il nov program «interreg» da l'Italia e Svizra saja er vegnì discutà. Quest program, finanzià da l'UE, l'Italia e la Svizra, cuntegna la promoziun da projects pitschens. Cunzunt la nova finamira dal project da rinforzar cultura ed il turissem persistent, considereschan omaduas regenzas sco schanza per las regiuns.
Collavuraziun tar cultura rumantscha
En il sectur da cultura e da la furmaziun collia l'ierta communabla da la gruppa linguistica rumantscha. Per extender la collavuraziun è planisà tranter auter il matg 2023 in «Festival da la poesia alpina dal preschent» cun 15 poetessas e poets dals trais territoris da linguas minoritaras.
