Tgi che tschertga ina chombra en in hotel arriva baud u tard sin las paginas da Booking.com. Sin la plattafurma da cudeschaziun datti numnadamain era il pli favuraivel pretsch. Tar la plattafurma vala numnadamain ina uschenumnada «garanzia dal meglier pretsch». Vul dir: hotels na dastgan betg porscher las chombras pli favuraivel sin in'autra plattafurma – era betg sin l'atgna pagina d'internet.
Plant collectiv cunter Booking.com er cun 150 hotels grischuns
L’hotellaria europeica ha inoltrà in plant collectiv cunter la plattafurma da reservaziuns pervi dal squitsch da pretschs. Era 150 hotels grischuns sa participeschan a quest plant. Quel pretenda indemnisaziuns per las sperditas tras ils pretschs sfurzads. Il president da Hotelleriesuisse Grischun Ernst Wyrsch ha declerà envers il schurnal regiunal da SRF – ch'ins saja da l'avis che l'hotelier haja il dretg sin las medemas cundiziuns sco il concurrent. Ils hotels han mintgamai pajà 1'000 francs per sa participar al plant – quai per cuvrir ils custs da preparaziun per il process giuridic.
Il plant collectiv da passa 10'000 hotels da l'entira Europa va enavos sin ina sentenzia dal Tribunal europeic da l’atun 2024. Tenor sentenzia n'èn uschenumnadas «garanzias dal meglier pretsch» betg lubidas. Il cas sto dentant anc vegnir tractà avant ina dretgira ad Amsterdam, là nua che la plattafurma da cudeschaziun ha sia sedia. Sche questa garanzia da pretschs n'è pia propi betg lubida vegn anc tractà. Tenor Ernst Wyrsch sajan ins dentant da buna speranza da gudagnar.
