Oriundamain era il process per sclerir sch'ins avess gia stuì serrar pli baud las sendas en Val Bondasca planisà l'ultim quartal dal 2024. Lura però è quel vegnì spustà sin l'atun 2025 ed uss hai danovamain dà ina midada. Il process duai avair lieu il 2026, il datum exact n'è betg anc enconuschent. Quai ha il pledader da las dretgiras grischunas Stefan Schmid confermà suenter che pliras medias avevan rapportà en chaussa. Motiv per spustar il process sajan raschuns formalas, plinavant stoppia la dretgira rimnar ulteriur material da cumprova.
Accusada è tranter auter l'anteriura presidenta communala da la Bregaglia Anna Giacometti sco er collavuraturs da l'uffizi chantunal da guaud e privels da la natira.
In cas per la dretgira regiunala Malögia
Ins avess stuì serrar preventivamain las sendas. Uschia avess'ins tut tenor pudì evitar la mort d'otg persunas. A questa conclusiun vegn la procura publica sin basa d'in rapport independent che las parentas ed ils parents da las unfrendas han laschà far in geolog.
La dretgira regiunala Malögia sto decider sche tschintg persunas han agì cun negligientscha. La procura publica renfatscha d'avair valità fauss la situaziun da segirtad. Quai scriva il «Beobachter». Sin dumonda da RTR scriva l'Uffizi da guaud e privels da natira dal Grischun ch'ins prendia per enconuschientscha l'accusaziun. Ed il chantun haja grond interess che la dretgira sclereschia bainspert il cas en l'interess da tut ils pertutgads.
Il geolog independent è da l'opiniun ch'igl haja dà divers indizis ch'han annunzià la bova ed il ristg saja stà inacceptabel. Accusads d'avair decidì fallà en questa situaziun èn collavuraturs da l'Uffizi chantunal da guaud e privels da natira, la presidenta communala da Bondo da lezzas uras e cussegliera naziunala Anna Giacometti ed in'ulteriura persunas ch'era tschentada en da la vischnanca da lez temp.
Critica davart il rapport
Ils collavuraturs dal chantun han crititgàn fermamain il rapport independent. Tenor els saja per gronda part mintgin sez responsabel per sia segirtad sin questas sendas, ed il ristg na saja betg stà inacceptabel. Plinavant giajan las opiniuns dapart, tge che valia sco indiz per ina bova, e tge betg. Per las persunas accusadas vala la presumziun d'innocenza.
Gia il 2019 aveva l'uffizi renvià las renfatschas, e la procura publica grischuna aveva terminà sias investigaziuns en chaussa. Davant il Tribunal federal han las parentas ed ils parents dentant cuntanschì, ch'ella sto puspè prender si las investigaziuns.
Or da l'archiv