L’access per la chamona Sciora en la Val Bondasca è segirà. La radunanza communala da Bregaglia ha dà glisch verda al credit dad 1,15 milliuns francs per la construcziun d’ina nova senda. Previs è ina senda d’ina lunghezza da var 4 kilometers, da la vart dretga da la Val Bondasca, ordaifer la zona da privel. Per in access segir, sajan er prevesidas 3 u 4 punts pendentas, sco Fernando Giovanoli, il sindaco da Bregaglia ha ditg ad RTR.
Avertura l'onn 2025
Per la finanziaziun possian ins far quint cun contribuziuns dal chantun Grischun, il Club alpin svizzer e diversas donaziuns. La vischnanca haja da contribuir maximalmain 200’000 francs, uschia Giovanoli. Las emprimas lavurs da construcziun possian cumenzar anc quest onn. Sche tut va bain, pudessan la chamona Sciora e la senda avrir l'onn 2025. Dapi la bova da Bondo, l’onn 2017 è la chamona Sciora e l’access a quella serrà.
