En la vischnanca Bregaglia datti trais scolas. La scolina e scola primara a Vicosoprano, la scola dal stgalim aut a Stampa e la scolina e scola bilingua a Malögia. Ils ultims onns ha la vischnanca registrà pliras novas famiglias cun uffants. Gist a Malögia s'haja la cifra da scolaras e scolars augmentà marcantamain. Dapi l’onn 2020 hai numnadamain dà 11 novas scolaras e scolars.
Sfidas organisatoricas
L’edifizi a Malögia è 121 onns vegl ed haja diversas mancanzas. Ensemen cun l’augment da scolaras e scolars, na saja in’instrucziun optimala betg pli pussaivla, ha ditg Jon Bischoff, suprastant communal, a la saira d’infurmaziun. Perquai sajan dumandadas soluziuns. In studi che la vischnanca ha laschà far, demussia ch’i dovra in nov edifizi da scola a Malögia. La scola bilingua, che vegn purschida dapi l’onn 2005, saja sa cumprovada e desister sin quella na vul la vischnanca betg.
Suenter passa 120 onns n'è questa scola simplamain betg pli funcziunala.
Chasa da scola per 8 milliuns francs
Finanzialmain fiss ina centralisaziun da las duas scolas Malögia e Vicosoprano il pli favuraivel. Quai avess però la consequenza, che la scola bilingua va a perder e che quai chaschunass, tenor Jon Bischoff, ina malcuntentezza generala. La vischnanca propona perquai da construir ina nova chasa da scola a Malögia, direct sper la sala polivalenta. Quai avess er l’avantatg ch’ella na fiss betg pli sper la via principala. Previs sajan actualmain var 8 milliuns francs per il project.
Sch'i na vegn betg investì en ina nova chasa da scola, na vegnan en avegnir betg pli novas famiglias a Malögia.
I fa prescha
Quel nov edifizi fetschia prescha. Gia sin la stad che vegn, na porscha la chasa da scola existenta a Malögia numnadamain betg pli avunda lieu per tuts. Perquai ha la vischnanca er elavurà in project per in provisori. Previs èn tenor Jon Bischoff 11 containers sin dus plauns. La suprastanza suttametta perquai duas dumondas da credit a la radunanza communala dal favrer: In credit da planisaziun da 350'000 francs per il nov edifizi da scola ed in ulteriur credit da 300'000 francs per il provisori. Sche tut va sco giavischà, vulan ins avair pront il project concret la primavaira da l'onn 2024.
