La scola primara Malögia ha fin uss adina pudì occupar las plazzas avertas, di la manadra da scola Elena Salis. Dapi intgins onns dettia però plitost paucas annunzias.
Er la scola primara La Punt Chamues-ch ha tenor la manadra da scola Marina Suter chattà persunas d'instrucziun qualifitgadas. I saja mintgamai grev per lur scola pitschna che porschia plitost plazzas cun pensums parzials, cunquai che persunas che han gist finì la Scol'auta pedagogica vulan savens lavurar a temp cumplain. Uschia hajan els savens substituts e substitutas, cunzunt per la promoziun da linguas estras per Rumantschs e Rumantschas.
Spezialisaziun sin ils idioms po esser in problem
Per la scola primara Trin saja stà grev quest'onn d'occupar tut las plazzas, manegia il manader Christian Erni. Sco motivs numna el ch'i sa tractava da plazzas parzialas ed il fatg ch'i vegniva tschertgà persunas ch'instrueschan rumantsch grischun. Students e studentas da la Scol'auta pedagogica n'elegian actualmain betg pli savens rumantsch grischun e sa spezialiseschian plitost sin ils idioms. Quellas persunas stuessan lura anc far ina scolaziun supplementara. La finala saja dentant gartegià d'occupar tut las plazzas.
Persunal constant e collavuraziun gida
La scola Puntraschigna ha tenor il manader Fadri Feuerstein il cletg ch'il team da magistraglia è fitg constant. Uschia na stoppian els mumentan betg ir a la tschertga da scolasts e scolastas.
I gidia da collavurar. Elena Salis da Malögia raquinta da la collavuraziun cun la scola taliana a Vicosoprano. I dettia bleras persunas ch'instrueschian en omadus lieus, uschia ch'ins possia emplenir largias. Ch'ins gidia in l'autra di era Marina Suter da La Punt Chamues-ch. Lur scolasts sajan en contact cun autras scolastas da l'Engiadina.
Tschertas persunas d'instrucziun sajan spezialmain grevas da chattar: manaders da scolina, scolastas spezialisadas ch'instrueschan roms sco sport u zambregiar u scolasts bilings per il stgalim superiur.
