Brusio - Co èsi insumma vegnì tar l'incendi?

• L'incendi da guaud a Brusio na sa derasa betg pli, ha ditg la polizia chantunala grischuna.
• Trais helicopters civils e dus da l'armada èn gievgia puspè en acziun per stizzar ils ultims gnieus da fieu.
• Il fieu è rut ora mardi suentermezdi durant brischar restanzas d'in plazzal ed è sa derasà sin ina surfatscha da dus kilometers quadrat.
• En las valladas dal sid grischunas regia in scumond absolut da far fieu pervia dal grond privel d'incendis da guaud.

Dapi mardi suentermezdi, pia dapi dus dis, arda il guaud a Brusio en il Puschlav. La raschun per il fieu è probablamain ina barschada da rumida permessa d'ina firma da construcziun – la polizia è dentant anc vid eruir quest cas.

Tge che fa surstar – tar noss vischins en il Tessin era il privel da fieu gia grond, il mument ch'il fieu è rut ora – e per part devi schizunt scumonds da far fieu, entant ch'il privel valeva en il Puschlav anc sco considerabel. Il manader da l'uffizi da guaud e privels da natira Urban Maissen declera, che las valladas dal sid dal Grischun collavuran stretgamain cun il Tessin, ma questa giada n'èsi betg stà uschè sitg en il Grischun sco en il Tessin.

Ins quintia dentant cun quai, che la firma da bajegiar ch'è responsabla per brischar il rument, haja gì ina lubientscha da brischar il material. Schebain ins survegn ina lubientscha u betg, na dependia dentant betg dal stgalim dal privel da fieu, ha declerà Urban Maissen. Questa permissiun vegn concedida da l'uffizi per l'ambient e pertutga la qualitad da l'aria.

Cura che quest material vegn brischà, saja la responsabladad da la persuna u la firma che ha survegnì la lubientscha. Ils responsabels hajan dentant pers la controlla dal fieu ed enfin uss n'è il fieu, che s'extenda sur dus kilometers quadrat, anc adina betg stizzà.

Tren cursescha puspè il venderdi

A partir dal venderdi cursescha il tren da la lingia da Bernina puspè tenor urari tranter Poschiavo e Tirano. La lingia è stada serrada dapi il mardi suenter che l'incendi da guaud è rut ora sper il viaduct a Brusio. Quest tschancun vegnia observà durant ch'il tren cursescha, ha communitgà la Viafier retica. En cas ch'i dettia in privel, possia il tren uschia ad uras vegnir franà.

La polizia chantunala ha communitgà la gievgia saira ch'ins haja pudì franar l'incendi da guaud. Ins saja vinavant vid cumbatter gnieus da fieus locals. La gievgia èn per quai puspè stads en acziun quatter helicopters. En tut haja il fieu destruì radund in mez kilometer quadrat guaud da protecziun.

Las lavurs per reparar la lingia d'electricitad vers Viano vegnian ad esser terminadas il venderdi saira, hai num en ina communicaziun. La via che maina tar il vitg Viano è dapi la mesemna suentermezdi puspè averta.

Il fieu è rut ora il mardi suentermezdi a las 15:40. Las flommas eran sa derasadas sin ina surfatscha da dus kilometers quadrat en vischinanza dal viaduct da tren a Brusio. Per betg impedir las lavurs da stizzar è il spazi d'aria vegnì serrà, quai enfin gievgia saira.

Tenor emprimas enconuschientschas è il fieu rut ora durant brischar restanzas d'in plazzal, ha communitgà la Polizia chantunala. Per quest intent haja dà ina lubientscha.

En las valladas dal sid èsi scumandà da far fieu

En las valladas dal sid grischunas regia il mument in scumond absolut da far fieu. Quai pervia dal privel d'incendis da guaud. Tant en il Puschlav sco er en il Mesauc, la Calanca e la Bregaglia na dastga uschia er betg vegnì durvrà fuainas fixas, quai communitgescha il chantun Grischun sin sia pagina online.

Il chantun ha ordinà mesemna bun'ura ils scumonds en la Val Poschiavo e Bregaglia. Mardi cura ch'il fieu è rut ora valiva in privel da fieu considerabel en il Puschlav, quai ha ditg sin dumonda da RTR l'Uffizi da privels da la natira dal Grischun. En Calanca ed il Mesauc èsi gia dapi ils 26 da mars scumandà absolutamain da far fieu.