Siglir tar il cuntegn

Header

video
Christian Rathgeb preschenta ses ultim budget
Or da Telesguard dals 13.10.2022.
laschar ir. Durada: 2 minutas 32 Secundas.
cuntegn

Budget chantunal Bun 10 milliuns francs deficit per il 2023

Il Grischun quinta per l'onn proxim cun in deficit da 10,4 milliuns francs. Cunquai sa mova il budget pli u main en il rom da l'onn passà, cura ch'il minister da finanzas Christian Rathgeb aveva annunzià in deficit da 9 milliuns francs. Oz preschenta el ses ultim budget sco cusseglier guvernativ.

Las finanzas chantunalas èn vinavant stabilas – er sch'igl è da far quint ils onns 2024-26 cun pli paucas entradas da la gulivaziun da finanzas da la Confederaziun. I na sa mida pia betg bler vi da la situaziun finanziala e vi dals appels dal minister da finanzas.

audio
Las sfidas dal budget grischun 2023 cun Christian Rathgeb
ord Actualitad dals 13.10.2022.
laschar ir. Durada: 3 minutas 59 Secundas.

Investiziuns en projects gronds

Il chantun vul investir anc ina giada dapli l'onn proxim, numnadamain 451,2 milliuns francs. Quai èn bun 30 milliuns francs dapli ch'en il budget per l'onn current. En il budget 2023 figureschan projects gronds sco per exempel da renovar il dal center da dietas dal Plantahof, construir in nov bajetg da l'Uffizi per il traffic a Roveredo, sanar il bajetg per la Dretgira superiura a Cuira ubain realisar il nov campus per la Scola auta spezialisada a Cuira.

Dapli exepensas – er per fugitivs ucranais

Tut en tut quinta il chantun cun dapli expensas l'onn proxim (+4,8%). Ina raschun èn ils custs en connex cun ils fugitivs da l'Ucraina: Per lur sustegn vegnan calculads 28,9 milliuns francs dapli. Per la tgira dals fugitivs èn budgetads 4,6 milliuns francs custs da persunal. Il chantun survegn dentant er pajaments da cumpensaziun da la Confederaziun, quai en furma da pauschalas per persunas cun il status da protecziun «S».

Vendita d'immobiglias ha effect

Dentant er las entradas da taglia creschan vinavant: L'onn 2023 fa il chantun quint cun total 879,2 milliuns francs, quai è in plus dad 8%. En egl dattan surtut las entradas da la taglia sin il gudogn entras vender immobiglias, là quinta il chantun cun 22 milliuns francs dapli.

Sguard en l'avegnir

Sco adina ils ultims onns avertescha il minister da finanzas Christian Rathgeb ch'ils deficits chantunalas vegnian a crescher. I saja da quintar cun minus da tranter 65 e 112 milliuns francs ils onns 2024-26. La raschun sajan dapli expensas che entradas e surtut na dastgia il chantun betg quintar vinavant cun uschè grondas summas da la gulivaziun da finanzas da la Confederaziun.

La mesadad dals chantuns fan quint cun deficits

La chareschia, ils pretschs d'energia e la guerra influenzeschan ils budgets da tut ils chantuns. Ils milliuns da la Banca naziunala, che pudessan crudar ora, engrevgeschian en pli er anc la planisaziun dals budgets, scriva l'agentura da novitads SDA.

Dapli che la mesadad dals chantuns fan quint cun deficits l'onn che vegn. Il deficit dal Grischun è plitost bass en congual cun auters chantuns. Quint cun ils pli gronds deficits fan il chantun da Turitg e da Genevra cun enturn ina mesa milliarda.

RTR novitads 09:00

Artitgels legids il pli savens

Scrollar a sanestra Scrollar a dretga