- mintga terza persuna che lavura è periclitada d'in burnout
- mintga segunda renta d'invaliditad va ad ina persuna cun ina malsogna psichica
- 6,5 milliardas francs per onn custa il stress dals collavuraturs e collavuraturas als patruns e patrunas da lavur
In burnout è ina circumstanza che fa vegnir malsauna, saja quai corporal-, emoziunal- u spiertalmain. In dals trais elements centrals è la stancladad emoziunala, nua ch’ins n'ha betg pli energia u ch'ins sa senta surdumandà. In auter element è la depersunalisaziun sch’ins mida il cumportament envers il visavi. Il terz element è la prestaziun persunala, sch’ins ha fadia da sa concentrar, sch’ins fa dapli sbagls u è main creativ. Il burnout è in process, i cumenza cun sintoms levs, cun il sforz da sa mussar. Alura daventa quai adina pli grev, ins snega conflicts ed ins sa retira da la vita sociala.
Pli grevs cas da burnout signifitgan in incendi en il tscharvè. Ed enfin ch'i crescha là puspè erva, dura quai ditg, ins na po betg trair vi da l’erva, per ch’i creschia pli spert.
Er vacanzas n'han betg gidà ad Urs Brandenburger
Urs Brandenburger era en ses tschuncanta, cura ch'el ha gì sur in onn mal il dies e na pudeva betg durmir. El lavurava en ses affar da svilup d’organisaziun e sco docent a la Scola auta spezialisada superiura IBW e n'haja mai pensà vi d'in burnout. El ha pensà che quest stress e las dulors van davent cun ir en vacanzas, dentant han er questas pausas gidà nagut. Fin ad ina damaun, nua ch'i na funcziunava betg pli.
Jau sun vegnì en biro ed il visur n'era betg cler, jau hai badà ch'il problem n'era betg il visur, ma mes egls. Suenter diesch minutas sun jau ma dasdà giun plaun, perquai che jau erel dà enturn ed erel en in stadi da schoc.
En quest mument ha l'um da Trimmis realisà ch'i na va betg pli. Ils proxims mais sajan stads fitg grevs per el, per sia dunna e ses uffants. Cunquai che nagina clinica aveva plaz, ha Urs Brandenburger stuì spetgar a chasa. Lura ha el pudì ir en ina clinica da burnout, nua che tut ils pazients e pazientas eran en la medema situaziun sco el. Suenter in'emna a chasa è l'um independent e docent, crudà en ina rusna ed ha stuì ir en in'autra clinica e suenter en la psichiatria.
Jau hai stuì ir en la psichiatria, perquai che jau erel en privel da far suicidi.
En la psichiatria è el stà per trais mais, las visitas da la famiglia hajan fatg bain. Suenter prest dus onns è Urs Brandenburger sa remess da ses burnout. Dentant èsi stà in lung process:
- in onn cun dolurs, enfin ch’el ha chapì ch'el dovra agid
- trais mais spetgar a chasa, fin ch'ina plazza en la clinica è libra
- trais quarts d’onn cun agid professiunal en duas clinicas ed en la psichiatria
- in mez onn a chasa per sa revegnir dal tut
E 16 mais suenter il collaps en il biro, ha Urs Brandenburger puspè entschavì a lavurar en ses affar e sco docent. Ed oz lavura l'um da 67 anc adina, er sch’el fiss pensiunà.
