Las rentas da cusseglieras e cussegliers guvernativs en pensiun èn gia pli ditg in politicum en il Grischun. Actualmain survegnan quellas e quels che sortan da la regenza numnadamain ina renta e quai per vita duranta. La fin da november decida il suveran grischun co ch'i va vinavant cun questas rentas. El ha la schelta tranter l'iniziativa da la PPS che vul abolir dal tut la renta e la cuntraproposta che prevesa ina renta da maximalmain trais onns per anteriuras cusseglieras ed anteriurs cussegliers guvernativs.
Renta da radund 100'000 francs ad onn
Ozendi enconuschan dasper il Grischun be pli ils chantuns Vad e Berna la pratica da pajar rentas ad anteriurs commembers e commembras da la regenza chantunala. Tar la renta quintan era prestaziuns d’invaliditad e la renta da relaschads. Pli ditg che insatgi è stà en la regenza, pli auta che la renta è, maximalmain enturn 115’000 francs. Tenor la PPS na saja quai betg necessari.
En il parlament chantunal ha la proposta da la PPS da stritgar dal tuttafatg la renta gì in grev stan. La regenza ha elavurà ina cuntraproposta che vul ina renta da maximalmain trais onns. Ina maioritad da las deputadas ed ils deputads è s'exprimì per la cuntraproposta.
Il Grischun cun intginas spezialitads
Il sistem da rentas per la regenza era vegnì introducì ils onns 40 e 50. Da quel temp na devi anc betg ina segunda pitga per persunas en la regenza.
En il Grischun èsi actualmain uschia che cussegliers e cusseglieras guvernativas pon esser maximalmain 12 onns en uffizi. Questa restricziun en Grischun è la pli rigurusa da la Svizra. Durant ils onns activs survegnan las persunas en la regenza enturn 270’000 francs l’onn.
Questa restricziun d’onns d’uffizi maina chaschuna che intginas persunas sortan gia en ina vegliadetgna relativamain giuvna or da l’uffizi e survegnan entras quai sur blers onns ina renta. Al medem mument han els ina buna paja durant a carriera ed era suenter bunas schanzas sin ina buna lavur. Era pervia da quai na saja la renta tenor la PPS betg necessaria.