Siglir tar il cuntegn

Header

video
Cussegl grond scursanescha pensiun d'anteriurs cussegliers guvernativs
Or da Telesguard dals 15.02.2023.
laschar ir. Durada: 2 minutas 24 Secundas.
cuntegn

Pensiuns sut la marella Rentas per cussegliers guvernativs duain vegnir limitadas

Las rentas dad anteriuras cusseglieras e cussegliers guvernativs duain vegnir limitadas. Il Cussegl grond ha surdà a la regenza l'incumbensa dals liberaldemocrats.

Actualmain survegnan anteriuras commembras e commembers da la regenza fin la fin da lur vita ina renta che dependa da lur temp d'uffizi e po esser fin 110'000 francs ad onn. Il Cussegl grond è da l'avis che quai saja stravagà. Perquai ha el decidì che questa renta duai mo pli vegnir pajada fin maximalmain tar la vegliadetgna da pensiun. Quai tanschia.

audio
Cussegl grond: Rentas per anteriurAs cusseglierAs scursanidas
ord Actualitad dals 15.02.2023.
laschar ir. Durada: 4 minutas 7 Secundas.

Deputadas e deputads han uss surdà a la regenza l'incumbensa dad elavurar ina proposta co questa renta scursanida duai guardar ora. Sin maisa eran anc duas ulteriuras incumbensas en il medem connex. La PPS ha vulì stritgar las rentas dal tut ed ils verd-liberals han vulì ch'i dettia mo trais onns ina renta. Questas duas propostas n'han dentant chattà nagina maioritad.

Per tge pensiun vai

Avrir la box Serrar la box

Suenter che commembers u commembras da la regenza sa retiran survegnan els ina pensiun per il rest da lur vita. Sch'els partan gia l'emprim onn, lura è la pensiun 3,5% da lur paja sco commember. Per mintg'onn en l'uffizi vegnan 3,5% vitiers. Suenter 12 onns è quai tar la paja actuala en la regenza circa 110'000 l'onn.

Sche lur entrada surpassa il salari annual d'ina commembra da la regenza, na vegn betg pajà ora il surpli.

PPS lantscha iniziativa

La PPS n'è insumma betg cuntenta cun la decisiun dal Cussegl grond da mo limitar las rentas e betg stritgar ellas dal tut. Perquai vul ella lantschar ina iniziativa dal pievel cun la finamira da stritgar las rentas dad anteriuras ed anteriurs cussegliers guvernativs. Quai ha il president da la partida, Roman Hug annunzià en il Cussegl grond. Per l'iniziativa dovri almain 3'000 suttascripziuns.

audio
La sessiun è ida a fin cun limitar rentas
ord Actualitad dals 16.02.2023. Maletg: Keystone
laschar ir. Durada: 2 minutas 3 Secundas.

Quai di la lescha

Avrir la box Serrar la box

La pensiun (Ruhegehalt) che cussegliers guvernativs survegnan suenter lur uffizi è descritta en artitgel 8 da la lescha davart ils salaris:

1 Suenter l'extrada or da la regenza exista in dretg supplementar sin ina pensiun per vita duranta. La pensiun importa per mintga onn d'uffizi 3,5 pertschient dal salari ch'è vegnì retratg sco ultim. Mintga onn d'uffizi cumenzà quinta sco onn cumplain.

2 Sch'ina anteriura commembra u sch'in anteriur commember da la regenza realisescha in'entrada da gudogn che surpassa – ensemen cun la pensiun – il salari annual d'ina commembra u d'in commember en uffizi, sto la pensiun vegnir reducida per l'import supplementar. Prestaziuns or da la prevenziun professiunala valan sco entrada da gudogn, e quai per la valur da la renta.

RTR novitads 18:00

Artitgels legids il pli savens