En ses 12 onns sco cusseglier guvernativ ha Mario Cavigelli inaugurà numerus sviaments, siglientà tunels, gulivà vias, bajegià vi da Sinergia, vi da la praschun da Cazas e vi dal nov bajetg dal museum d'art a Cuira. El ha revidì la lescha da chatscha e quella davart il traffic, fatg ina nova lescha da guaud ed ina strategia da forza idraulica – quai per be numnar insaquantas fatschentas impurtantas da ses departement.
Sin ses merit puncto energia idraulica è Mario Cavigelli er il pli losch, èsi grategià ad el da mantegnair ils tschains d'aua cur che las interpresas d'energia na vulevan betg pli pajar quels. Pli pauc empernaivel saja stada l'entira episoda dal cartel, «quella avess jau gugent stritgà sche quai fiss pussaivel», tira el bilantscha.
Adina finanzas solidas
Christian Rathgeb ha ils ultims 4 onns guardà da las finanzas dal chantun ed ha adina pudì preschentar in budget solid cun cifras nairas, schizunt suenter ils onns da pandemia. Dapli action ha el dentant gì anc en ses temp sco minister da sanadad e giustia. In temp intensiv ha el gì cur ch'el ha cumbattì per in center da requirents d'asil en il anteriur hotel Rustico a Laax – là era la populaziun sa defendida cun pes e mauns cunter l'intent dal chantun. La fin finala ha il tribunal decidì per il chantun.
In da ses highlights percunter è stà sia planisaziun da spitals per las regiuns – cur che la Confederaziun vuleva introducir dumbers da cas minimals è el sa defendì per il Grischun, autruisa avessan per exempel spitals regiunals betg pli pudì esser responsabels per exempel per naschientschas sco el fa l'exempel.
