L'urset american – el entra tras portas da giats, prenda dapart tut quai ch'el sa, fa donns vi da las isolaziuns e lascha enavos ses fastizs – ed el sa derasa rasantamain. Passa dus milliuns ursets americans datti actualmain en Germania. Uschè charin sco ch'el para – el è ina mulesta. Ina mulesta ch'è gia vegnida sur ils cunfins. Giu en la Bassa chaschunan quests «pirats» adina per dapli problems, sco in rapport dad SRF ha mussà dacurt. Fin en il Grischun èsi pia mo pli in sigl da giats, sco ch'ins di. Lukas Walser da l'Uffizi da chatscha po dentant quietar.
Per fortuna n'avain nus anc betg quels problems. Nus avain adina puspè observaziuns dentant mo da singuls cas.
Obsevaziuns restan tuttina
Vitiers vegnia che las observaziuns restian pli u main tuttina. L'onn passà han ins vis 4-5 exemplars e quai cunzunt en la regiun da la Val dal Rain ed en l'Engiadina Bassa. Quels animals sajan probabel vegnids da l'Austria. Quai saja dentant mo speculaziun. La situaziun saja pia da tegnair en egl. Dentant agir a moda preventiva – quai saja fitg grev, damai ch'ins na possia betg simplamain trair ina saiv enturn il chantun Grischun, di l'expert.
A nus na fa l’urset american betg mal il venter. Ma quai po svelt sa midar, cunzunt sch'ins dat in sguard sin autras regiuns, nua che la populaziun crescha rasantamain.
Animals invasivs che fan donn al ecosistem
Cunquai ch'i sa tracta d'uschenumnads «Neozoen» pia d'animals invasivs che na tutgan betg en noss ecosistem, dastgan chatschaders e chatschadras sajettar durant la chatscha l'urset american. Quai saja fitg impurtant, accentuescha Lukas Walser da l'uffizi da chatscha.
L’urset american: el è tranter nus en il Grischun. Dentant sa tracti mo da fitg paucs exemplars. La situaziun, quella è anc sut controlla.