En il Grischun pon da nov er persunas senza pass svizzer ma cun permissiun da dimora daventar policist u policista. La regenza ha decis d’adattar la procedura da recrutaziun per render accessibla questa professiun ad in circul da persunas pli vast.
La pretensiun d'in pass svizzer n'è betg pli adattada al temp.
Per pudair recrutar avunda persunal giuven ha la Polizia chantunala dal Grischun gia adattà u abolì ils ultims onns lur pretensiuns sco per exempel la grondezza minimala e la vegliadetgna. Ma i na vegnia betg pli simpel da daventar policist u policista, las pretensiuns per ina buna reputaziun u er per ina psica ferma per exempel, vegnian a restar las medemas. Cun la mesira vulan ins sulet engrondir il pool da persunas cun il potenzial da far la lavur.
Access a la scolaziun
Tar la Polizia chantunala lavuran tut en tut 400 policistas e policists. Mintg'onn absolvan 15 fin 25 aspirantas ed aspirants dal Grischun la scolaziun da policista u policist a las scolas da polizia en la Svizra Orientala ed en il Tessin. Quella cuzza dus onns. Persunas cun la permissiun C pon ussa s'annunziar per il test d'admissiun per questa scolaziun.
