Tar il portal sid da la Gallaria «Drögli» tranter Ziràn e Tusaun è crappa crudada sin via. Tenor Markus Walser dal post da medias da la Polizia chantunala sa tracti d’in pitschen cas.
L’Uffizi da construcziun bassa saja vidlonder da rumir la via. L’autostrada A13 è dentant gia puspè charrabla en ina direcziun – prest duai la via puspè esser libra en omaduas direcziuns.
Ulteriuras bovas na sajan il mument betg enconuschentas en il Grischun. I saja però dapertut da manischar a moda precauta il mument cun quai che sin las vias pudessan esser singuls craps, uschia Walser.
Vischnancas en la responsabladad
La situaziun vegnia permanentamain persequitada ed analisada da las vischnancas, uschia Huwiler. Ellas hajan da far il mument la gronda lavur ed hajan er la responsabladad.
Cunfin da naiv e durada da plievgia fan quitads
Quai che fetschia dentant quitads, saja ch'ins stoppia quintar cun anc dapli plievgia fin damaun a bun'ura, di Huwiler. Precar pudess quai vegnir surtut en cumbinaziun cun il cunfin da naiv ch'è uss sin radund 2'000 meters sur mar – ed en las valladas dal sid.
Igl è da quintar ch’i dat localmain inundaziuns.
SRF Meteo quinta surtut en il Puschlav, la Bregaglia ed il Mesauc vinavant cun bleras precipitaziuns.
RR actualitad 12:00
