Siglir tar il cuntegn

Header

video
Nua èn ils lufs?
Or da Giuventetgna dals 17.05.2021.
laschar ir. Durada: 56 Secundas.
cuntegn

Adina dapli lufs Il dumber da lufs en il Grischun crescha fitg svelt

Il dumber da lufs en il Grischun crescha fitg svelt. Quai tenor Adrian Arquint, il manader da l'Uffizi da chatscha e pestga. Per dir nua ch'i dat novs trieps saja però anc memia baud. Per il mument dettia dentant lufs en l'entir chantun.

Svilups en direcziun d'ina concentraziun da lufs sajan da vesair en il Partenz, en l'Engiadina, en la regiun dal Beverin sco er en Surselva. Confermads èn actualmain sis trieps. Quants che vegnan vitiers sa mussia en il decurs da la stad cura ch'ils lufs pitschens sa mussian.

Stgarps a Zignau – la lescha impedescha d'intervegnir

A Zignau en la vischnanca da Trun ha in luf stgarpà mez matg tschintg nursas e blessà diesch ulteriuras uschè grev ch'ellas han stuì vegnir durmantadas. Capità è quai radund 600 meters davent dal vitg. Las nursas eran protegidas d'ina saiv che correspunda a las prescripziuns da l'Uffizi federal d'ambient.

audio
Trun dumonda da sajettar trais lufs giuvens
ord Actualitad dals 17.05.2021.
laschar ir. Durada: 3 minutas 24 Secundas.

Il dumber da stgarps per pudair sajettar il luf fiss cun las 15 nursas atgnamain cuntanschì ed i fiss tenor Adrian Arquint er necessari da pudair intervegnir immediatamain. Cunzunt er perquai ch'il luf haja mussà cun siglir sur la saiv in cumportament problematic.

Intervegnì vegn probabel pir l'atun

Cunquai ch'i sa tractia però d'in triep da lufs vegniss tenor lescha federala en funcziun la regulaziun. E quella pertutga er ils pitschens dal tierp. Quants pitschens ch'i dettia, saja però pir cler il fanadur u avust. Uschia vegniss ina interveziun pir en dumonda l'atun.

video
Co vinavant suenter las stgarpadas a Zignau?
Or da Giuventetgna dals 17.05.2021.
laschar ir. Durada: 4 minutas 1 Secunda.

RTR novitads 17:00

Artitgels legids il pli savens