La lescha da linguas pretenda ch'ils trais linguatgs uffizials dal Grischun vegnan represchentads a moda adequata. Quai na capitia betg adina sco giavischà. Uschia ha la politica adina puspè crititgà ch'il tudestg haja surmaun envers il rumantsch e talian. Quai per exempel tar tavlas, inscripziuns u autras infurmaziuns a la populaziun en vischnancas rumantschas, talianas u bilinguas. Per survegliar che quai na capitia betg pli, installescha il chantun uss in post per l'administraziun plurilingua. Quai saja necessari di cusseglier guvernativ Jon Domenic Parolini. Uss vegnia numnadamein guardà memia pauc che l'administraziun chantunala e las vischnancas applitgeschian correctamain la lescha da linguatgs.
Per ademplir la lescha da linguatg sto insatgi er survegliar quai, quella part è vegnida controllada memia pauc sistematic enfin uss.
Lia Rumantscha e PGI beneventan il nov post
La nova persuna che s'occupa da l'administraziun plurilingua lavura ensemen stretgamain cun las organisaziun da lingua sco la Lia Rumantscha e la Pro Grigioni italiano. Omaduas èn cuntentas ch'il chantun prendia uss vair questa incumbensa. Andreas Gabriel spera cunzunt ch'il post survegnia avunda cumpetenzas per che quel possia er controllar, uschiglio tunia quai be bain en la teoria. La Pro Grigioni italiano spera cunzunt ch'i dettia in meglierament sin nivel da las regiuns. Tenor la secretaria generala Aixa Andreetta vegnia il talian per exempel a la curta en la regiun Malögia, là domnieschan il tudestg ed il rumantsch.