Siglir tar il cuntegn

Header

audio
L'accusa encunter l'anteriur schef da la Raiffeisen Pierin Vincenz
Or da Actualitad dals 03.11.2020.
laschar ir. Durada: 02:56 minutas.
cuntegn

Affera Raiffeisen Accusaziun cunter Pierin Vincenz è pronta

La procura publica da Turitg ha accusà l'anteriur schef da la Raiffeisen Pierin Vincenz. En l'accusa vai tranter auter per engion professiunal.

Er accusà dasper Vincenz vegn l'ex schef d'Aduno Beat Stocker, quai scriva la procura publica da Turitg en ina communicaziun a las medias. Set ulteriuras persunas èn pertutgadas da las investigaziuns.

Als dus accusads principals vegn renfatschà engion professiunal, defraudaziun, falsificaziun da documents e corrupziun massiva cun dischavantagiar la gruppa da cartas da credit Aduno e la banca Raiffeisen.

Expert è surstà

La procura publica ristgia bler cun l'accusaziun davart fraud professiunal cunter l'anteriur schef da la banca Raiffeisen Pierin Vincenz. Quai ha ditg l'expert da dretg Peter Kunz envers SRF. El saja surstà davart l'accusaziun ed il dumber da las persunas accusadas. Avant hajan ins discurrì da gestiun malfidaivla, uschia Kunz. Il squitsch saja dentant tar la procura publica da Turitg. Ella stoppia cumprovar las renfatschas. Tar ina sentenzia senza chastì fiss quai ina penibla terrada per la procura, ha ditg Kunz.

Il cumenzament

La fin favrer 2018 aveva la procura publica da Turitg cumenzà in'inquisiziun penala encunter pliras persunas, quai pervi da administraziun malfidaivla d'affars. Vincenz è vegnì durant quest temp en arrest d'inquisiziun. Mez zercladur 2018 era el puspè vegnì liber.

Recapitulaziun eveniments Pierin Vincenz

Textbox aufklappenTextbox zuklappen
  • Finma investighescha transacziuns dad Aduno e Raiffeisen, nua che Pierin Vincenz gioga ina rolla (tar Aduno sco president dal Cussegl d'administraziun, tar Raiffeisen sco CEO). Da sclerir: Sch'i ha dà in conflict d'interess ubain schizunt donns, cura che Raiffeisen ha cumprà Aduno.
  • December 2017: Finma sistescha la procedura cunter Pierin Vincenz, suenter che lez è sa retratg da tut las funcziuns da manar tar la Helvetia.
  • December 2017: Aduno e Raiffeisen fan denunzia penala cunter Pierin Vincenz ed in'ulteriur commember dal cussegl d'administraziun.
  • 25-1-2018: Vincenz desista dal presidi en il Cussegl d'administraziun da la Repower.
  • 27-2-2018: La polizia interroghescha Pierin Vincenz e fa perquisiziuns en pliras chasas. La procedura marscha cunter Vincenz e quatter ulteriuras persunas.
  • 3-3-2018: Pierin Vincenz vegn en arrest d'inquisiziun.
  • 16-5-2018: Dretgira prolunghescha arrest d'inquisiziun.
  • 12-6-2018: Procura publica lascha liber Pierin Vincenz cun cundiziuns. Las inquisiziuns cuntinueschan.
  • 18-7-2018: Schef da la Raiffeisen, Patrik Gisel, sa retira per la fin dal 2018. Cun quest pass vul el finir la debatta publica enturn sia persuna e proteger la reputaziun da la banca.
  • 27-9-2018:La procura publica ha avert ina procedura cunter l'um da fatschenta da Genevra Stéphane Barbier-Mueller per avair gidà a gestiun malfidaivla.
  • 9-11-2018: In di avant la radunanza da delegads hai num en ina communicaziun che Patrik Gisel dat giu per immediat tut sias funcziuns. Uschia sajan el ed il cussegl d'administraziun sa cunvegnids.
  • 3-11-2020: Suenter dus onns e mez ha la procura publica turitgaisa serrà giu sias inquisiziuns. L'accusa encunter Pierin Vincenz stat. Er Beat Stocker vegn accusà dasper Pierin Vincenz. Ulteriuras set persunas èn pertutgadas da las investigaziuns.

Ord l'archiv

video
Il cas Pierin Vincenz
Or da Nouvo RTR dals 06.03.2018.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga