Tant il campadi a Trun, quel a Davos Munts en la Lumnezia, quel a Sur En/Sent sco er il campadi Muglin en la Val Müstair han nudà circa tuttina bleras reservaziuns sco l'onn passa. Pervia da las malauras hai bain dà intginas annullaziuns a curta vista, ma blers decidan spontan e plazs libers vegnan emplenids spert.
I n'è betg uschè nausch, ch’igl è uss trid'aura, perquai ch’i dat adina avunda persunas che vegnan era, sch’i na dat betg l’entir di sulegl.
Ils plazs da rulottas èn dentant pli tschertgads ch’ils plazs per las tendas. Cumpareglià cun l’onn passà èn circa 20% dals plazs da tendas libers pervia da la plievgia e las temperaturas pli bassas, di Peter Käch.
Sin il campadi Obere Au a Cuira hai anc intginas plazzas libras, sco ch'ina visita al lieu mussa. Aua gronda en il Rain – ch'è mo pauc davent dal campadi – na para dentant betg da far vegnir malsegir ils osps sin il campadi.
Vacanzas en l’exteriur
Tuttina sentan ils campadis davent da la Surselva enfin en la Val Müstair, ch’ins po puspè far vacanzas en l’exteriur. Uschia ha per exempel il campadi Morteratsch a Puntraschigna 10% damain giasts che l’onn passà
Pia, malgrà plievgia èn ils campadis che RTR ha dumandà visitads bain. Tuttina speran las manadras ed ils manaders sin bell'aura per il proxim temp. Lura saja la vita sin il campadi pli empernaivla.
