Siglir tar il cuntegn

Header

Navigaziun

Maschina da construcziun a Scuol.
Legenda: PUK è vid finir in'emprima part da ses rapport – il cartel da construcziun en Engiadina Bassa resta vinavant en il focus. Keystone
cuntegn

Cartel da construcziun In onn PUK – rapport avant la finiziun

Suenter in onn da lavur saja il rapport da la cumissiun parlamentara d'inquisiziun, meglier enconuschenta sco PUK, tar il cartel da fabrica quasi a fin. Quai ha annunzià la cumissiun sezza en ina communicaziun a las medias.

Curt & concis:

  • Terminadas èn las inquisiziuns da la cumissiun parlamentara d'inquisiziun, la PUK, en il cas da l'acziun da polizia cunter l'interprendider Adam Quadroni.
  • Anc betg terminada e l'investigaziun tar la rolla da commembers da la regenza e da collavuraturs da l'administraziun en chaussa cartels da construcziun.
  • LaCIP lavura dapi in onn per sclerir quests dus temas. In rapport parzial saja per vegnir finì.

Dapi l'emprima sesida ils 22 da zercladur 2018 haja quai dà enfin uss passa 40 sesidas per intercurir il cas dal cartel da construcziun, scriva la cumissiun parlamentara d'inquisiziun il glindesdi en sia communicaziun a las medias.

La PUK Cartel da construcziun

Personen-Box aufklappenPersonen-Box zuklappen

Ils 13 da zercladur 2018 aveva concludì il Cussegl grond unanimamain dad installar ina cumissiun parlamentara d'inquisiziun – pli current PUK sut la scursanida tudestga per «parlamentarische Untersuchungskommission». En il cas actual è la lezia da la PUK da sclerir las cunvegnas da cartel en la branscha da construcziun.

Sin maisa èn dus temas centralas: Il cumportament envers l'impressari e whistleblower Adam Quadroni e la rolla da la regenza e collavuraturs da l'administraziun en connex cun il cartel da construcziun.

Questa PUK sa cumpona da ses president Michael Pfäffli (PLD, San Murezzan), la vice-presidenta Beatrica Baselgia-Brunner (PS, Domat), Walter Grass (PBD, Urmein), Jan Koch (PPS, Igis) e da Livio Zanetti (PCD, Landquart).

Las investigaziuns èn s'occupadas da duas tematicas:

Punct 1: L'acziun da polizia cunter Quadroni

Quest'investigaziun saja terminada ed i vegnia lavurà sur stad vi da l rapport parzial en chaussa. Enfin uss sajan vegnidas fatgas interrogaziuns ed investigaziuns.

Suenter, cura ch'il rapport è sin maisa, survegn el la uschenumnada «attenziun girudica» – vul dir che las persunas involvidas pon guardar il rapport e prender posiziun en chaussa. En la sessiun da december 2019 duai il Cussegl grond discutar en chaussa.

Punct 2: Rolla da regents ed uffiziants

Parallelmain a questas investigaziuns ha la PUK l'incumbensa dad investigar sche commembers da la regenza u collavuraturs da l'administraziun hajan surprendì lur responsabilitad tar las proceduras da submissiun.

Qua annunzia la PUK dad esser anc adina interessada vi dad observaziuns u infurmaziuns che savessan esser impurtantas per sia lavur.

RR novitads 09:00