La Confederaziun ha auzà gia mez december ils daners per sustegnair firmas che pateschan fitg da la pandemia – sco per exempel ustarias, biros da viadi u organisaturs da concerts. Uss ha il chantun reglà ils detagls.
Dabun daners han firmas cun sedia en Grischun e che han fatg 40% pli pauca svieuta pervi da corona. Quai cumpareglià cun la media dals davos dus onns. Sche quels ed ulteriurs criteris èn ademplids, po il chantun lubir contribuziuns da fin in mez milliun francs per firma – contribuziuns ch'ins na sto betg pajar enavos. Inoltrar dumondas pon ins fin ils 30 d'avrigl.
Gia la primavaira durant l'emprima unda aveva il chantun pajà bunamain 1,2 milliuns francs per uschenumnads «cas da direzza». En tut 128 firmas avevan dumandà sustegn, 84 han survegnì ina resposta positiva.
