En las chasas d'attempads emprovan ils collavuraturs e las collavuraturas da tuttina far in zic tempra da Nadal – er durant la pandemia. Saja quai cun pitschnas activitads, concerts ch'ils attempads pon guardar da fanestra or u decoraziuns.
Nus stuain proteger noss abitants dad ina infecziun. Ma nus na pudain betg isolar els.
Karin Luzio organisescha activitads en il Center da sanadad a Savognin per ils seniors surmirans. Uss, cura che tut è restrenschì saja anc pli impurtant che las cussadentas ed ils cussadents pon sa divertir a moda confurma.
Visitas durant il temp da Nadal èn la sfida
Gist durant quest temp, cur che blers s'inscuntran cun lur famiglias, sajan las mesiras actualas ina sfida. Mintga chasa d'attempads ha ses agen concept da segirezza che vala actualmain per visitaders e bleras chasas d'attempads èn vid elavurar concepts che valan en spezial per il temp da Nadal.