Avant la chauma avevan ins gì dubis ch’i dettia suenter las elecziuns naziunalas forsa anc pli paucas dunnas en il parlament – cunzunt en il Cussegl dals chantuns. Quai n’è betg capità. Tenor Tamara Funiciello è gliez ina consequenza directa da la chauma da dunnas dals 14 da zercladur 2019. Era l’anteriura presidenta da la Juso ha dumagnà il sigl en il Cussegl naziunal
Mia elecziun è in resultat da la chauma da dunnas
Ed en il Grischun avevan ins gì starment che forsa mo umens vegnian elegids en il parlament federal. La finala han ils Grischuns tarmess tantas dunnas sco anc mai a Berna: Magdalena Martullo, Sandra Locher ed Anna Giacometti. Per la sindicalista grischuna Angela Thiele è era quai in effect da la chauma.
Tuttina n'è ina represchentanza da dunnas equilibrada en la politica anc ditg betg cuntanschida .
Progress pitschnin puncto pajas
Areguard pajas gistas – in vegl postulat d’egualitiad – han ins era fatg mo pitschens progress. I dettia blers manaschis che hajan suenter la chauma introducì transparenza da paja, di Angela Thiele, sindicalista da l’Unia e co-organisatura da la chauma da dunnas en il Grischun.
Plinavant stoppian grondas societads d’aczias a partir dal 2021 manar atras analisas da paja. Ma d’ina paja eguala sajan ins anc lunsch davent. A partir da las 15.30 lavurian las dunnas gratuiut – cumpareglià cun las pajas dad umens, di Angela Thiele.
Era sche bleras prentensiuns n’èn anc betg ademplidas, è Tamara Funiciello optimista.
La chauma da dunnas ha politisà tantas dunnas. Uss procurainsa per midadas
Entras la chauma sajan sa furmadas impurtantas raits da dunnas. L’effect da questas raits sa mussia pir ils proxims onns. Plinavant cuntinueschian las chaumas e protestas, dian Funiciello e Thiele.
Chauma da seser a Cuira
La dumengia ils 14 da zercladur organisescha il comité da chauma grischun ina chauma da seser da la staziun a Cuira fin a la plazza da l'Arcas. L’onn proxim datti plirs giubileums: 50 onns dretg da votar per dunnas, 30 onns dapi l’emprima chauma da dunnas, 230 onns dapi la declaraziun dals dretgs da las dunnas.
Tgi che ha sperà che las chaumas chalan, ha sbaglià bravamain
