Surtut la cundiziun e la rutina da las chantaduras ed ils chantadurs saja actualmain pli pitschna. Quai di Heinz Girschweiler, ch'è president da la cumissiun da musica da l'Uniun chantunala da chant dal Grischun. Perquai èsi er cler, che tut ils chors u er las uniuns da musica stoppian cun puspè far provas far intgins pass enavos.
Igl è, sco sch'ins ha fatg ina pausa cun far sport. Lura dovran ins puspè in temp per vegnir puspè fit.
El sez dirigia intgins chors, actualmain fan els mo provas en gruppas pitschnas. Quant ferm che la qualitad dals chors ha laschà suenter, n'è dentant anc betg pussaivel da dir. Er en las uniuns da musica n'è il nivel suenter la pausa betg pli uschè aut. Il president da l'Uniun chantunala da musica, Andy Kollegger, tema surtut, che musicantas u musicants han durant la pandemia chalà da sunar. Quantas persunas ch'han bandunà in'uniun na possian ins dentant anc betg dir.
Fin ch'ina uniun da musica u in chor è puspè sin il nivel musical d'avant la pandemia, possia quai dentant ir fitg svelt. Sche las chantaduras ed ils chantadurs èn motivads, haja in dirigent circumstanzas idealas per puspè bajegiar si il chor.
La proxima occurrenza gronda per chors è la Festa svizra da chant il matg 2022 a Gossau en il chantun Son Gagl. Quella festa saja ina buna finamira, manegia Heinz Girschweiler. Da vegnir a quella occurrenza puspè sin in nivel sco avant la pandemia saja ina ambiziun, ma realistic.
