Siglir tar il cuntegn

Header

Stanza d'hotel.
Legenda: Keystone
cuntegn

Cifras da pernottaziuns Ils giasts da l'exteriur han mancà er il favrer

En Grischun hai dà il favrer stgars 20% damain pernottaziuns, en l'entira Svizra 40% damain – cumpareglià cun avant in onn. Mancà en Grischun han surtut ils giasts da la Germania.

Ils hotels en il Grischun han nudà il favrer stgars 20% damain pernottaziuns, cumpareglià cun il favrer dal 2020. Da las grondas destinaziuns ha cunzunt quella dad Engiadina San Murezzan pers bleras pernottaziuns – quai cun in minus da var 27%. Enstagl da 240'000 pernottaziuns ha quella regiun pudì nudar be stgars 175'000 pernottaziuns. Quai annunzia l'Uffizi per economia e turissem.

video
San Murezzan cun minus da 51% tar pernottaziuns
Or da Telesguard dals 25.03.2021.
laschar ir

Be ina pitschna reducziun da las pernottaziuns hai percunter dà en las regiuns da Lai e da Laax/Flem. Enstagl dad 81'000 pernottaziuns hai dà quai stgars 78'000 pernottaziuns ed uschia ina reducziun per be radund 4%.

Bler damain Tudestgs, ma dapli Polacs

En Grischun han surtut ils giasts da la Germania mancà il favrer. Il segund mais dal 2020 avevan anc passa 130'000 Tudestgs e Tudestgas pernottà en il chantun, il favrer da quest onn èn quai stads be passa 34'000 persunas da la Germania. Quai correspunda ad ina reducziun da stgars 74%.

Persuenter han dapli turists da la Pologna visità quest favrer il chantun Grischun. En tut passa 20'000 pernottaziuns han Polacs e Polacas generà il favrer en Grischun. Quai è in plus da 370%, cumpareglià cun il favrer dal 2020, cura che passa 4'300 pernottaziuns eran idas sin il conto da turists da la Pologna.

40% damain pernottaziuns en l'entira Svizra

Er il favrer han cunzunt ils giasts da l'exteriur mancà en ils hotels svizzers.
Il dumber da pernottaziuns en ils hotels en Svizra è sa reducì il segund mais dal 2021 per 40% - cumpareglià cun l'onn avant. En tut èn uschia en l'entira Svizra vegnidas dumbradas 2 milliuns pernottaziuns en hotels. Quai annunzia l'Uffizi federal da statistica, sin basa da cifras provisoricas. Il schaner aveva corona procurà per ina reducziun da schizunt 58% tar il dumber da pernottaziuns.

Tar ils giasts da l'exteriur hai dà il favrer ina reducziun da 80% tar las pernottaziuns. Ma er 4% damain Svizzers han pernottà il favrer en hotels en Svizra.

RTR novitads 09:00

Artitgels legids il pli savens

Scrollar a sanestra Scrollar a dretga