La polizia chantunala grischuna ha controllà da mesemna fin venderdi 97 plazzals e manaschis, 94 butias e differents lieus d'excursiun per guardar, sche las prescripziuns da la Confederaziun en connex cun il coronavirus vegnan resguardadas.
Quai che pertutga las mesiras d'igiena e da distanza, tira la Polizia chantunala ina fitg buna bilantscha. Be tschintg persunas en il parc da cura a Tavau, n'hajan betg mussà chapientscha per il basegn da tegnair distanza. Mintgina d'ellas haja survegnì ina multa da 100 francs. Tar las controllas da differents manaschis ha la Polizia chantunala stuì far 17 reclamaziuns. Quai surtut tar lavandarias d'autos ch'han stuì serrar.
Betg il temp per far excursiuns
La gievgia ed il venderdi sontg ha la Polizia chantunala controllà en tut 1'950 autos e 140 motociclists sin l'autostrada A13, la via principala H28 e sin las vias dals pass. La polizia ha surtut tschertgà il discurs cun ils automobilists ed appellà a quels da surpigliar responsabladad per sasez e per auters. Intgins haja ella pudì persvader dad interrumper il viadi e returnar a chasa.
Populaziun sa tegna vid scumond da far fieu
Dapi ils 25 da mars vala en Grischun in scumond general da far fieu ordaifer ils lieus abitads. Fin al venderdi sontg è la populaziun sa tegnida bain vi da quest scumond. Sulettamain en il guaud da Flem han duas persunas stuì vegnir chastiadas, perquai ch'ellas avevan fatg in fieu per grillar.
