L'analisa da las cifras dal mars mussia ch'i haja dà en l'entira Svizra dapli mortoris en cumparegliaziun cun il medem temp d'auters onns. La raschun saja cleramain il coronaviurs, uschia la media chantunala.
La gronda part dals cas nua che la malsogna finescha cun la mort, pertutga persunas cun 65 onns e dapli. Gist quella gruppa da persunas saja er ina da las duas raschuns principalas che giustifitgeschian da serrar butias, fatschentas, scolas sco er da star a chasa. I giaja per proteger quella gruppa da ristg nua ch'i saja cleramain cumprovà ch'i dettia dapli mortoris.
Sche nus avessen laschà vegnir l'unda senza far insatge, lura fissan nus stads cumplettamain sur la limita da noss sistem da sanadad. Lura avessan nus gì situaziuns sgrischaivlas sco en l'Italia u frosa anc mendras.
Ospitals grischuns èn anc lunsch davent dals cunfins
Era grazia a las mesiras rigurusas, sajan ils ospitals grischuns preparads bain per il cas che l'unda gronda vegnia. Quai sa mussa tenor la media chantunala probablamein ils proxims 10 dis. Sur tut ora sajan ils ospitals grischuns il mument anc lunsch davent dals cunfins. Sulettamain l'ospital dal Puschlav haja strusch pli letgs libers. Ma sch'i fagess basegns vegnessan pazients repartids sin auters ospitals.
Mascras per tuts – gea u na?
Tenor Marina Jamnicki èn mascras ordaifer la lavur da tgira cunzunt nizzaivlas per persunas malsaunas. Cun purtar ina mascra possian quellas evitar da dar vinavant il virus a persunas saunas. A persunas saunas dettian las mascras plitost in sentiment da segirtad en il senn da far insatge per proteger sa sez ed ils auters.
Sch'ins cussegliass però a tuts da purtar ina mascra, lura purtassen per 99% persunas saunas ina tala, uschia la media chantunala. Pia quels nua ch'i na dettia betg in basegn. Ed i na saja insumma betg cumprovà che quai portia insatge.
