Siglir tar il cuntegn

Header

audio
Rudolf Leuthold davart ils trais ulteriurs cas en Engiadin'Ota
Or da Actualitad dals 02.03.2020.
laschar ir. Durada: 01:51 minutas.
cuntegn

Coronavirus Actualmain 9 cas en Grischun

En l'Engiadin'Ota èn trais ulteriuras persunas s'infectadas cun il coronavirus. Las persunas sajan en in bun stan da sanadad, scriva l'Uffizi chantunal da sanadad. Tut en tut ha il Grischun enfin uss nov persunas ch'èn testadas positiv sin il coronavirus.

Ins saja uss londervi da contactar eventualas persunas da contact dals novs cas. Sche necessari vegnian talas messas sut quarantina. Tenor il schef da l'uffizi Rudolf Leuthold dettia puspè in liom cun l'Italia, sco ils cas d'enfin uss. Duas da las trais persunas sajan stadas avant curt a Milaun, ha Leuthold ditg envers l'agentura da novitads Keystone-SDA.

Enfin uss era mo ina famiglia vegnida testada positiv sin il virus. Tenor il manader da l'Uffizi chantunal da sanadad, Rudolf Leuthold na datti per il mument nagin connex direct tranter l'emprima famiglia taliana ed ils trais novs cas.

Tuts 9 cas en Engiadin'Ota

En tut ha il Grischun uschia nov persunas ch'èn testadas positiv sin il coronavirus. Nov ulteriurs tests èn anc en examinaziun. Che tut las persunas testadas positiv sa chattian en l'Engiadin'Ota haja in motiv: Là hajan dapli persunas contact cun glieud en l'Italia, là nua ch'i ha er dapli cas dal coronavirus.

impressiun ord il labor.
Legenda: En tut ha il Grischun testà fin uss 126 persunas sin il coronavirus. Tar 108 persunas è il test stà negativ, tar nov persunas positiv. Ulteriurs 9 cas vegnan anc sclerids. Keystone

Acziuns da dar sang han lieu

Acziuns da dar sang han lieu

Acziuns da dar sang en il chantun Grischun han lieu sco planisà. Naginas acziuns da donaziun sajan periclitadas pervia dal coronavirus, quai ha confermà Sonja Heer, la manadra da fatschenta da Donaziun da sang Grischun. Sulettamain vid il proceder sa midian pitschnas chaussas. Uschia fetschian els cun mintga donatura e donatur in check da sanadad avant che dar sang. Plinavant suondian els a las prescripziuns d’igiena da las autoritads e guardian d’evitar che memia blera glieud sa rimna en in lieu.

Tut las infurmaziuns davart las donaziuns da sang datti sin www.blutspende-gr.ch, il link avra en ina nova fanestra. Tar dumondas pon donaturas e donaturs s’annunziar per telefon 081 353 15 54.

Il chantun recumonda

Quai che pertutga occurrenzas vala vinavant in scumond per talas cun dapli che 1'000 persunas, dentant cun in caracter surregiunal u cun participaziun internaziunala. Pli pitschnas occurrenzas regiunalas giuditgeschan las autoritads chantunalas mintgina per sai.

Vitiers recumonda il chantun da desister d'occurrenzas cun dapli che 50 persunas. Uschia nizzegia il chantun la medema regla sco la citad da Cuira.

Infurmaziuns per la populaziun

Emprim agid psicologic:

  • Helpline Grischun 081 254 16 36
    (mintga di 08:00 - 17:00)

Dumondas generalas:

  • Infoline dal BAG 058 463 00 00
    (durant 24 uras)

Ulteriuras infurmaziuns:

RTR novitads 16:00