Il chantun adattescha las prescripziuns en connex cun occurrenzas. Vinavant scumandadas èn occurrenzas cun passa 1'000 persunas. Quai tenor las reglas da la Confederaziun.
Occurrenzas cun pli pauc che 1'000 persunas èn en il suandants cas lubidas senza in'analisa da risico dal chantun:
- pli pauc che 150 persunas
- las stanzas porschan sutgas per pli pauc che 300 persunas
- sche mintga persuna en la stanza ha dapli che 4 meters quadrat spazi
- en il liber pli pauc che 500 persunas
Quai munta pia che occurrenzas enfin 150 persunas èn da raschun tuttas lubidas. Da quellas cun dapli che 150 persunas ch'èn dadens èn lubidas mo sch'i ha sutgas per maximalmain 300 persunas. Sch'il local n'ha betg sutgas, lura dovri per persuna quatter meters quadrat spazi. Occurrenzas en il liber èn lubidas senza in'analisa da risico dal chantun fin a 500 persunas.
Diagram d'occurrenzas
La situaziun sa mida permanentamain
Entras il sistem federalistic en Svizra dettia er da chantun tar chantun differentas mesiras, ha ditg il minister da sanadad Peter Peyer. A la conferenza dals ministers da sanadad haja el vis che mintga chantun ha differents basegns. Impurtant è per Peyer: il manaschi da scola cuntinueschia sco enfin qua. Quai fetschia senn, uschia hajan els sut controlla ils uffants e pudessan reagir sch'i dess in cas.
11 persunas infectadas
La media chantunala Marina Jamnicki ha dà ina survista dals cas en il Grischun:
- Actualmain èn 11 persunas infectadas cun il coronavirus (uffants, dunnas ed umens). Tuttas persunas sajan en l’Engiadin’Ota e hajan ina relaziun cun l'Italia. Ellas sajan da buna sanadad.
- Las emprimas 6 persunas infectadas en l’Engiadin’Ota èn pli u main puspè saunas e pon bandunar questa fin d’emna la quarantina.
- En tut èn 210 persunas vegnidas testadas en il Grischun – 8 resultats èn anc pendents.
Marina Jamnicki ha repetì las mesiras da prevenziun:
- Mascras n’èn betg per persunas saunas, quellas fan be senn per persunas infectadas.
«Cun 150 persunas n'èsi betg pli pussaivel da proseguir in cas»
Cun occurrenzas d'in dumber critic da 150 persunas na saja quai betg pli pussaivel d'eruir danunder ch'ina infecziun eventuala vegn, ha ditg Rudolf Leuthold, il manader da l'Uffizi chantunal da sanadad. Perquai saja tant pli impurtant da tegnair distanza ed evitar contacts.
Sustegn en ospitals e dapli communicaziun
Da nov sustegna la protecziun civila era ospitals, actualmain l’Ospital chantunal a Cuira e l’ospital en l’Engiadin’Ota. Els repartian surtut artitgels d’igiena e mascras, ha declerà il schef dal stab directiv Martin Bühler.
Plinavant dettia adina dapli dumondas da medias, vischnancas e scolas. Perquai ha il chantun organisà a partir da glindesdi in post da communicaziun per respunder tut las dumondas en connex cun il coronavirus.
RTR novitads 12:00
