Il coronavirus ha chaschunà en il chantun Grischun in cas mortal: En la Val Puschlav è morta ina dunna da 78 onns durant la notg sin mardi. Gia avant l'infecziun cun il coronavirus pativa la dunna dad ina malsogna pre-existenta. Ord respect envers ils confamigliars, na fa il chantun naginas ulteriuras indicaziuns davart quest u auters mortoris.
En Svizra crescha il dumber dals infectads entant vinavant. Actualmain han las autoritads fadia dad elavurar il dumber, perquai che quel creschia uschè svelt, ha ditg Daniel Koch da l'Uffizi federal da sanadad. La Confederaziun dumbra entant 2'650 persunas ch'èn testadas positiv sin il virus, 300 dapli che glindesdi.
