Pervia da la situaziun epidemiologica en il chantun dastgan puspè avair lieu a partir dal 1. d'october occurrenzas grondas cun passa 1000 persunas. Sco per exempel concerts, represchentaziuns da teater, congress, occurrenzas da sport ed autras occurrenzas dadens e dadora. Mintga occurrenza sto preschentar in concept da protecziun cunter Covid-19 e sto vegnir permessa dal chantun. Il chantun ha fixà las premissas resguardond la situaziun epidemiologica. Sche quella situaziun sa pegiurescha u sche las mesiras previsas na vegnan betg observadas, po il chantun revocar ina permissiun.
Gia il mez avust aveva il Cussegl federal decis che la regla d’occurrenzas cun maximalmain 1’000 persunas scroda l’october.
Partiziun COVID tira bilantscha positiva
Tar la partiziun COVID lavuran circa 16 persunas spezialisadas dals secturs organisaziun, sanadad, dretg e communicaziun. L'Uffizi da sanadad tira ina bilantscha intermediara positiva. Ils contact tracers lavuran da glindesdi fin sonda. La planisaziun è organisada uschia che las resursas pon vegnir adattadas svelt a la situaziun epidemiologica.
